Innlent

Snjall pistill Páls eða hrein og klár lágkúra

Jakob Bjarnar skrifar
Páll og Illugi. Ekki leyfir af kurteislegu yfirbragði ritdeilna þeirra og undir krauma alvarlegar ávirðingar.
Páll og Illugi. Ekki leyfir af kurteislegu yfirbragði ritdeilna þeirra og undir krauma alvarlegar ávirðingar.

Páll Magnússon alþingismaður telur þá hræsnara, í það minnsta ekki samkvæma sjálfum sér, sem nú vilja að Sigríður Á. Andersen dómsmálaráðherra segi af sér en þögðu þegar Jóhanna Sigurðardóttir þá forsætisráðherra lenti í hremmingum vegna skipunar skrifstofustjóra í forsætisráðuneytinu.

Sigríður var dæmd í Hæstarétti sem segir að skipan hennar á landsréttardómurum sé ólögmæt en Jóhanna var dæmd sek af kærunefnd jafnréttismála og sögð hafa brotið brotið jafnréttislög. Ljóst er að sitt sýnist hverjum hvort hér sé um sambærileg mál að ræða.

Hinn hneykslaði Illugi
Páll beinir orðum sínum til Illuga Jökulssonar rithöfundar og álitsgjafa: „Nú langar mig að spyrja þig: Þegar Jóhanna Sigurðardóttir, þá forsætisráðherra, braut jafnréttislögin 2010 - krafðist þú þess þá opinberlega að hún segði af sér ráðherraembætti? Þegar Svandís Svavarsdóttir, þá umhverfisráðherra, braut lög um umhverfismál 2011 - krafðist þú þess þá opinberlega að hún segði af sér ráðherraembætti? Þegar Ögmundur Jónasson, þá innanríkisráðherra, braut jafnréttislögin 2012 - krafðist þú þess þá opinberlega að hann segði af sér ráðherraembætti? Ekki?“ spyr Páll og heldur ótrauður áfram:

Hver er samkvæmur sjálfum sér, þú eða ég?
„Núna nærðu ekki upp á nef þér af hneykslan yfir því að Sigríður Andersen sé ekki búin að segja af sér vegna þess að dómstólar komust að þeirri niðurstöðu að hún hafi ekki sinnt nægilega vel sjálfstæðri rannsóknarskyldu á hæfni umsækjenda um dómaraembætti. Nú get ég sagt þér að í engum ofangreindra tilvika taldi ég tilefni fyrir ráðherra til afsagnar (en í mörgum öðrum tilvikum sem ekki eru til umræðu hér!) Síðasta spurningin: hvor er samkvæmari sjálfum sér - þú eða ég?“

Pistill Páls hefur fengið mikil viðbrögð meðal vina hans á Facebook og nota menn tækifærið og sparka óspart til Illuga á þeim vettvangi. Hann er kallaður „skítapakk“ og „Illhugi“ og talinn vafi á að hann þori að svara, enda hafi hann engin svör. Svo snjall þykir pistill Páls. Óhætt er að segja að Illugi fái það óþvegið á Facebooksíðu Páls.

Lágkúra af hálfu Páls
En, Illugi svarar reyndar og notar vettvang sinn á Stundinni, hvar hann birtir pistla sína, til þess. Svar hans er ítarlegt og ljóst að honum þykir þetta hin mesta lágkúra af hálfu Páls, að stilla sér upp með þessum hætti. Og honum segir fátt eitt líkt með málum Jóhönnu og Sigríðar.

„Og ég verð að segja, Páll, að mér þykir satt að segja frekar billegt af þér, að ég segi ekki lágkúrulegt, að nefna Jóhönnu Sigurðardóttur hér til sögu. Mál hennar var bara ekki á nokkurn einasta hátt sambærilegt við mál Sigríðar nú, hvorki lagalega né siðferðilega, og á það hefur margoft verið bent. Það lá reyndar strax í augum uppi að kærunefnd jafnréttismála væri líklega á mjög hálum ís í því máli (um það má til dæmis lesa hér) og ég sá enga ástæðu til að krefjast afsagnar Jóhönnu vegna þessa.“

Víst er að þau viðhorf sem Páll setur fram og svo þau sem birtast í svörum Illuga verða enn um sinn umdeild.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.