Erlent

Trump kallar fyrrverandi yfirmenn leyniþjónustu og FBI lygara

Kjartan Kjartansson skrifar
Comey (t.v.), Clapper (f.m.) og Brennan (t.h.) fóru fyrir löggæslu og leyniþjónustu í tíð Baracks Obama, fyrrverandi Bandaríkjaforseta.
Comey (t.v.), Clapper (f.m.) og Brennan (t.h.) fóru fyrir löggæslu og leyniþjónustu í tíð Baracks Obama, fyrrverandi Bandaríkjaforseta. Vísir/AFP
Donald Trump Bandaríkjaforseti hellti úr skálum reiði sinnar yfir pólitíska andstæðinga og fyrrverandi yfirmenn alríkislögreglunnar FBI og leyniþjónustustofnana Bandaríkjanna á Twitter í morgun. Kallaði hann þá „mestu lygarana og lekarana í Washington“.

Twitter-árás forsetans beindist fyrst og fremst að Adam Schiff, oddvita demókrata í leyniþjónustunefnd fulltrúadeildar Bandaríkjaþings. Hann hefur verið áberandi í umræðu um ákvörðun Trump og repúblikana í nefndinni um að birta leynilegt minnisblað með ásökunum á hendur yfirmanna FBI og dómsmálaráðuneytisins.

Schiff lagðist gegn birtingu minnisblaðsins sem hann staðhæfði að drægi upp villandi mynd af vinnubrögðum stofnananna tveggja þegar þær fóru fram á heimild til að hlera fjarskipti fyrrverandi ráðgjafa framboðs Trump árið 2016. FBI varaði einnig við því að upplýsinga væri látið ógetið í minnisblaðinu sem hefðu mikil áhrif á sannleiksgildi ásakananna. Dómsmálaráðuneytið sagði það „gríðarlega glannalegt“ að birta það.

„Litli Adam Schiff, sem dauðlangar til að bjóða sig fram til hærra embættis, er einn mesti lygari og lekari í Washington, á sama stalli og Comey, Warner, Brennan og Clapper!“ tísti Trump og uppnefndi Schiff eins og hann gerir svo gjarnan við pólitíska andstæðinga sína.

Vísaði forsetinn þar til James Comey, fyrrverandi forstjóra FBI, Mark Warner, oddvita demókrata í leyniþjónustunefnd öldungadeildarinnar, John Brennan, fyrrverandi forstjóra leyniþjónustunnar CIA, og James Clapper, forstöðumanns Leyniþjónustu Bandaríkjanna. Trump hefur eldað grátt silfur saman með þeim öllum.

Sakaði hann Schiff jafnframt um að yfirgefa fundi í leyniþjónustunefndinni til að leka trúnaðarupplýsingum. Fullyrti forsetinn að stöðva þyrfti þingmanninn.

Trump hefur haldið því mjög á lofti að FBI og dómsmálaráðuneytið sé hlutdrægt og ósanngjarnt í sitt garð. Rannsókn stendur yfir á því hvort að framboð hans hafi átt í samráði við Rússa og hvort hann hafi reynt að hindra framgang rannsóknarinnar.Vísir/AFP
Röð árása á löggæslustofnanir Bandaríkjanna

Reiðilestur Trump er enn ein árás hans á æðstu löggæslu- og leyniþjónustustofnanir Bandaríkjanna. Hann hefur neitað að viðurkenna að fullu niðurstöðu leyniþjónustustofnananna að rússnesk stjórnvöld hafi reynt að hafa áhrif á forsetakosningarnar árið 2016 til þess að tryggja Trump sigur.

Undanfarið hafa árásir forsetans og repúblikana á Bandaríkjaþingi á FBI og dómsmálaráðuneytið, tvær æðstu löggæslustofnanir landsins, stigmagnast. Trump samþykkti að birta minnisblað repúblikana í leyniþjónustunefndinni fyrir helgi.

Rétt áður en minnisblaðið var birt sakaði Trump yfirmenn FBI og ráðuneytisins um að draga taum demókrata og vera hlutdrægir gegn repúblikönum. Svaraði hann því ekki beint hvort að hann bæri traust til Rods Rosenstein, aðstoðardómsmálaráðherrans sem fól Robert Mueller að stjórna Rússarannsókninni á því hvort að framboð Trump hafi átt í samráði við Rússa.

Trump skipaði bæði Christopher Wray, forstjóra FBI, og Rosenstein eftir að hann tók við embætti forseta. Bandarískir fjölmiðlar hafa greint frá því að Trump hafi reynt að reka Mueller og að undanfarið hafi hann beint spjótum sínum að Rosenstein.

Þá fullyrti Trump um helgina að minnisblaðið veitti honum algera uppreist æru. Kallaði hann Rússarannsókn Mueller enn einu sinni „nornaveiðar“.

„Þetta er bandarískt hneyksli!“ tísti Bandaríkjaforseti.


Tengdar fréttir

Eldfimar ásakanir í minnisblaðinu umdeilda

Njósnamálanefnd Bandaríkjaþings hefur birt hið umdeilda minnisblað sem verið hefur í umræðunni í Bandaríkjunum undanfarna daga. Í því má finna eldfimar ásakanir í garð Bandarísku alríkislögreglunnar og dómsmálaráðuneytisins.

Trump heimilar birtingu minnisblaðsins umdeilda

Donald Trump, forseti Bandaríkjanna, hefur heimilað birtingu á umdeildu minnisblaði Repúblikana sem gagnrýnir alríkislögregluna FBI og dómsmálaráðuneytið harðlega.

Alríkislögreglan grípur til varna

Ríkisstjórn Donald Trump og bandamenn hans á þingi standa nú í opinberum slag við Alríkislögreglu Bandaríkjanna og Dómsmálaráðuneytið.




Fleiri fréttir

Sjá meira


×