Innlent

Borðar ekkert nema dýraafurðir: „Rándýrin éta ekki af matseðli“

Þórarinn Þórarinsson skrifar
Shawn Baker hefur verið Ævari Austfjörð fyrirmynd í kjötátinu.
Shawn Baker hefur verið Ævari Austfjörð fyrirmynd í kjötátinu. vísir/vilhelm

Þeim fjölgar stöðugt sem kjósa vegan-lífsstíl og sniðganga allan mat úr dýraríkinu. Kjötætur hafa einnig verið að gera sig gildandi, fólk sem borðar ekkert nema dýr. Meðal annars með þeim rökum að mannskepnan er í grunninn rándýr, kjötæta.

Dr. Shawn Baker hefur einungis neytt dýraafurða í rúmt ár. Hann er 51 árs, fyrrum afreksíþróttakappi og segist aldrei hafa verið betur á sig kominn andlega og líkamlega.

„Þetta snýst ekkert um að vera á móti vegan. Heldur að vera með kjöti, heilbrigðu mataræði og heilsubót. Þetta er ekkert pólitískt baráttumál. Okkur er alveg sama hvað annað fólk borðar. Það borðar bara það sem það vill og lætur því líða sem best,“ segir Shawn sem telur kjötát allra meina bót.

„Mannskepnan er í grunninn kjötæta og hefur veitt, drepið og étið flestar skepnur merkurinnar frá fyrstu tíð. Þegar við skiljum okkur frá hinum prímötunum þróast limaburður okkar og axlir okkar hreyfast öðruvísi en hjá til dæmis sjimpönsum. Það er vegna þess að við vorum alltaf að kasta og þá ekki ávöxtum á milli okkar, heldur spjótum þegar við vorum á veiðum.“

Þegar steingerð mannabein, annars vegar 50.000 ára gömul og 5000 ára gömul hins vegar eru borin saman kemur í ljós að mannskepnan hefur lækkað í loftinu um sex tommur, beinin orðið þynnri, vöðvarnir rýrari og meira að segja heilinn hefur minnkað. Ég tel að við séum gerð úr rauðu kjöti.“

Shawn á hugmyndina að janúar sem alþjóðlegum kjötætumánuði, World Carnivore Month, og kjötætan Ævar Austfjörð, fékk hann til Íslands til þess að boða fagnaðarerindið í „kjötjanúar.“

Þeim félögum ber saman um að þeir hafi aldrei verið jafn vel á sig komnir. Krónískir liðverkir séu horfnir, lundin léttari og þeir hafi fundið aftur gamla snerpu í íþróttaiðkun sinni.

Shawn gefur lítið fyrir hugmyndir fólks um mikilvægi grænmetis í mataræði. „Á Íslandi hefur ekki verið mikið um grænmeti. Hvar áttuð þið að fá það fyrir 100 árum? Íslendingar eru með langlífustu þjóðum í heimi. Það er vegna þess að þið hafið lifað á heilbrigðum dýraafurðum, lambakjöti, skyri og sjávarfangi. Þetta er leyndardómurinn að baki hreysti þjóðarinnar.“

Shawn mælir með öllu dýrakjöti, osti og eggjum. Öllu úr jurtaríkinu og öllum kolvetnum er úthýst. Daglegur matseðill hans sjálfs er ennþá einfaldari. „Kíló af steik í morgunmat og kíló af steik að kvöldi. Ég borða ekki nema einu til tvisvar sinnum á dag sem hefur þau jákvæðu áhrif að maður verður ekki svangur. Ég fasta ekkert kerfisbundið, gónandi á skeiðklukku til þess að fylgjast með hvenær ég megi borða.

Hvenær borða ég? Þegar ég er svangur. Hvað borða ég? Steik. Hversu mikið borða ég? Þangað til ég er orðinn saddur. Einfalt. Eins og hvert annað dýr. Dýrin eru ekki með matseðil og reiknivél. Þau borða bara. Fólk með venjulega matarlyst og temur sér þetta mataræði endar yfirleitt með því að borða einu sinni til tvisvar á dag.“ 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira