Erlent

Pilturinn segir ástarfund með frjálsum vilja beggja

Kristján Már Unnarsson skrifar
Erna Solberg forsætisráðherra og Trine Skei Grande menningarmálaráðherra þegar ný rikisstjórn Noregs var kynnt á miðvikudag.
Erna Solberg forsætisráðherra og Trine Skei Grande menningarmálaráðherra þegar ný rikisstjórn Noregs var kynnt á miðvikudag. Mynd/TV-2, Noregi.
Ungi maðurinn, sem kemur við sögu í mest umtalaða máli Noregs þessa dagana, hefur nú sagt sína hlið á því sem gerðist í samskiptum hans og Trine Skei Grande í brúðkaupsveislu í Þrændalögum fyrir tíu árum. Trine, sem er formaður Venstre-flokksins og nýtekin við embætti menningarmálaráðherra, hefur í blaðaviðtölum þurft að sverja af sér ásakanir í samfélagsmiðlum um að hafa misnotað ungan pilt. Hann var þá 17 ára en hún 38 ára, og orðin þingmaður á Stórþinginu og varaformaður flokksins. 

Í viðtali við Verdens Gang kemur fram að manninum, sem nú er 26 ára gamall, hafi verið brugðið þegar hann heyrði hennar útgáfu á því sem gerðist á þessu ágústkvöldi síðsumars árið 2008. Því hafi hann ákveðið að skýra málið frá sinni hlið, án þess þó að vera nafngreindur opinberlega.

„Við höfðum bæði drukkið. Við gengum afsíðis og enduðum í jaðrinum á kornakri þar sem við lágum saman,“ segir maðurinn en vill ekki lýsa því nánar sem svo gerðist. Hann tekur þó fram að það hafi verið með frjálsum vilja beggja.

Í viðtalinu kemur fram að þau Trine hafi skipst á skilaboðum og talað saman eftir að netmiðillinn Resett birti fyrstu frétt af málinu í byrjun mánaðarins.

„Þá brá mér. Hún sagði mér sína útgáfu; að það hefði verið veisla og að ég hefði farið með hana á bak við hús og þar hefði ég farið upp á hana.“ 

Þrátt fyrir að atvikalýsingu þeirra beri ekki saman virðast þau sammála um að þau hafi bæði gengið til þessa af fúsum og frjálsum vilja, engri nauðung hafi verið beitt, og ekkert lögbrot framið en samræðisaldur í Noregi er 16 ár.

Á myndskeiði í frétt Verdens Gang má sjá hvar fréttamenn þráspyrja Ernu Solberg forsætisráðherra um hvort frásögn mannsins sé í samræmi við þá lýsingu sem Trine gaf Ernu á atburðinum.


Tengdar fréttir

Kvennastjórn í skugga krassandi kynlífssögu

Ný hægrigræn ríkisstjórn tók við völdum í Noregi í dag. Sögusagnir um kynlífshneyksli nýs menntamálaráðherra skyggja hins vegar á stjórnarskiptin.

Trine segist ekki hafa gert neitt saknæmt

Trine Skei Grande, nýr menningarmálaráðherra Noregs, segist ekki ætla að tjá sig um uppákomu sem varð árið 2008 en segist í viðtali við Verdens Gang telja að hún hafi ekki gert neitt saknæmt.




Fleiri fréttir

Sjá meira


×