Innlent

Engin lognmolla í kortunum

Stefán Ó. Jónsson skrifar
Það blés um Kórahverfi Kópavogs í gær. Íbúar hverfisins, sem og annarra hverfa, ættu að undirbúa sig fyrir sambærilegan vind á morgun.
Það blés um Kórahverfi Kópavogs í gær. Íbúar hverfisins, sem og annarra hverfa, ættu að undirbúa sig fyrir sambærilegan vind á morgun. Vísir/Vilhelm

Að sögn Veðurstofunnar er útlit fyrir „ágætisveður“ á öllu landinu í dag en þó verður suðaustankaldi austanlands framan af degi. Þá verður rigning suðaustantil fram eftir morgni, en annars smá skúrir eða slydduél á víð og dreif. Kólnar í veðri og hitinn verður á bilinu 0 til 5 stig síðdegis, en frystir norðaustantil í kvöld.

Landsmenn ættu að njóta veðursins meðan þeir geta því í nótt og á morgun nálgast kröpp og dýpkandi lægð sunnan úr hafi og fer þá að hvessa af suðaustri. Það verður kominn suðaustanstormur með slagveðurs-rigningu sunnan- og vestanlands annað kvöld. Vindhraðinn verður frá 18 til 25 m/s og hlýnar í veðri.

Sjá einnig: Veðrið í gær „sýnishorn“ fyrir komandi lægðir

„Enga lognmollu er að sjá í veðurkortum helgarinnar, enda fleiri öflug veðurkerfi á leiðinni með tilheyrandi hvassviðri og úrkomu. Því um að gera að flygjast vel með veðurspám, ekki síst ef leggja á land undir fót og muna að tryggja lausamuni í garðinum og á svölum, svo þeir takist ekki á loft vindhviðum,“ segir á vef Veðurstofunnar.

Veðurhorfur á landinu næstu daga

Á fimmtudag:
Vaxandi suðaustanátt, 18-25 m/s undir kvöld, hvassast við fjöll. Talsverðri rigning S- og V-til, en lengst af þurrt NA-lands. Hlýnandi veður, hiti 2 til 7 stig um kvöldið.

Á föstudag:
Suðaustan 18-23 m/s og talsverð eða mikil rigning á A-verðu landinu, einkum á SA-landi, en hægari og skúrir eða slydduél V-til. Hiti víða 2 til 7 stig.

Á laugardag:
Vaxandi sunnan- og síðan suðaustnátt með skúra- eða éljahryðjum, stormur og talsverð rigning eða slydda um kvöldið, en hægara og úrkomulítið N- og A-lands. Hiti 0 til 5 stig.

Á sunnudag:
Líklega suðaustlæg átt með éljum, en áfram hvasst og rigning fram eftir degi austanlands.

Á mánudag og þriðjudag:
Sennilega suðaustlæg eða breytileg átt með skúrum eða éljum víða um land.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira