Leikjavísir

Spilarar vilja losna við Kínverja úr PUBG

Samúel Karl Ólason skrifar
Mynd/Bluehole

Spilarar hins vinsæla skotleiks Playerunknown‘s Battlegrounds, eða PUBG, virðast orðnir þreyttir á svindli kínverskra spilara og kalla eftir því að þeim verði gert að spila við aðra Kínverja. Framleiðendur leiksins birtu í gær afsökunarbeiðni um að útreikningar vegna innri gjaldmiðils leiksins, Battle Points, hefðu verið rangir og að verið væri að laga þá villu. Umræðan fór þó nánast samstundis að snúast um kínverska svindlara.

Flestum virðist vera sama um að hafa ekki fengið rétt magn af BP. Þess í stað snúa flestar athugasemdirnar að því að koma eigi í veg fyrir að spilarar frá Kína geti spilað með öðrum spilurum í heiminum.

Afsökunarbeiðnina og umræðuna má sjá hér. Það er vert að vara við sumum athugasemdunum.

Margir spilarar kvarta einnig yfir því að spilarar frá Kína virðist einblína á að skemma fyrir þeim sem spili á vefþjónum í Norður-Ameríku. Þeir hægi á leikjunum og skjóti jafnvel félaga sína í bakið.

Það er smá baksögu að finna þarna en í fljótu máli er hún á þá leið að á undanförnum mánuðum hefur kínverskum spilurum PUBG fjölgað mjög. Sömuleiðis sagði framleiðandi leiksins í síðasta mánuði að meirihluti þeirra spilara sem svindla í PUBG væru frá Kína, eða allt um 99 prósent þeirra.

Þá sagði Bendan Greene einnig að svindl í tölvuleikjum væri ekki jafn óásættanlegt í Kína og annars staðar. Hann var hins vegar ekki á því að rétt væri að læsa Kínverja inni á vefþjónum í Kína.

„Já, meirihluti svindla koma frá Kína, en það þýðir ekki að allir Kínverjar séu svindlarar. Sú hugmynd að vegna nokkurra svindlara sé réttast að banna heilt land finnst mér ekki rétt,“ sagði Greene.

„Þeir elska leikinn. Af hverju ættum við að banna þeim að spila á öðrum vefþjónum? Ég skil ekki viðhorf sumra.“

Hægt að græða mjög á svindli
Kvartanirnar snúa þó ekki eingöngu að því að svindlarar skemmi fyrir öðrum. Heldur einnig því að svindlarar græði raunverulega peninga á því að svindla. Hægt er að nota Battle Points til þess að kaupa kassa og fá úr þeim einhvern klæðnað á persónu leiksins. Stundum þarf svo að borga raunverulega peninga til að opna kassa sem keyptir hafa verið fyrir BP.

Spilarar sem fá mikið af BP geta keypt fleiri kassa og fengið sjaldgæfari klæðnað. Það er hægt að fá mikið af BP með því að svindla og drepa kannski alla aðra spilara.

Klæðnaðurinn í leiknum gengur svo kaupum og sölu í raunheimum og er jafnvel hægt að selja klæðnað á tugi þúsunda króna.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira