Lífið

Ætlar að útskýra eðli ljóðsins fyrir krökkum

Stefán Þór Hjartarson skrifar
Aðalsteinn er með ýmislegt í verkfærakistunni sem getur vakið áhuga krakka á ljóðinu.
Aðalsteinn er með ýmislegt í verkfærakistunni sem getur vakið áhuga krakka á ljóðinu. Fréttablaðið/Vilhelm

Um helgina hefjast Dagar ljóðsins í Kópavogi. Þar er ýmislegt á boðstólum eins og opinn hljóðnemi, Nýlókórinn, listsýning og þeim lýkur svo með hápunktinum sem er afhending Ljóðstafs Jóns úr Vör, en hann verður afhentur í Salnum á sunnudaginn 21. janúar. Fyrsti viðburður Daga ljóðsins verður á morgun, laugardag, klukkan 13, en það er ljóðasmiðja „í léttum dúr“ – þar sem Aðalsteinn Ásberg Sigurðsson, rithöfundur og tónlistarmaður, mun leiða börn á aldrinum 8 til 12 ára um undraheima ljóðsins.

Segðu mér Aðalsteinn, hvað verður brallað þarna í smiðjunni?

„Ja, það er nú erfitt að svara því, þetta er svona tilraun. Kópavogsbær fékk mig inn til að halda smiðju og svo veit maður ekkert hvað út úr þessu kemur – í fyrsta lagi veit maður ekkert hvað kemur inn af krökkum í þetta. Allavega, það sem ég ætla að gera er að útskýra fyrir þeim aðeins hvað er ljóð, hvernig maður hugsar ljóð og hvaða aðferðum er beitt þegar ljóð eru samin.“

Þú ert sem sagt ekkert að fara inn í þetta með einhverja tilbúna kennsluskrá?

„Nei, alls ekki. Það er erfitt að vera með svoleiðis – maður veit ekki hvernig hópurinn er fyrirfram. En ég er með ýmislegt í verkfærakistunni má segja, og svo beitir maður því eftir því hvernig hópurinn er.“

Þá einhverja leiki og æfingar og annað?

„Já, það er svolítið þannig, og aðferðir til að nota í svona hópi.“

Það hlýtur að vera skemmtilegt að fá að kenna ungu fólki um ljóðið?

„Ungt fólk er rosalega opið og það er alltaf gaman að vinna með því þess vegna. Stundum lærir kennarinn mest af því að vera með námskeið, það er líka spennandi – maður er svona hluti af því, þetta er ákveðið samvinnuverkefni. Maður kemur alltaf reynslunni ríkari úr svona og þess vegna er maður líka til í að gera svona hluti, það kennir manni alltaf eitthvað og er þroskandi fyrir mann sjálfan.

Bæjarfélagið á sannarlega lof skilið fyrir að hafa sinnt þessu með Ljóðstafnum og líka þessum dögum núna, mér finnst þetta alveg frábært. Kópavogsbær fær sérstakt prik fyrir það.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.