Lífið

Dróninn flýgur öðruvísi en flugvél

Benedikt Bóas Hinriksson skrifar
Helgi Rúnar Sævarsson, atvinnu- og kappflugmaður með sinn dróna.
Helgi Rúnar Sævarsson, atvinnu- og kappflugmaður með sinn dróna.
Maður fær mikla hraðatilfinningu við að stýra dróna. Margir finna fyrir hálfgerðri sjóveiki og verður illt í maganum. Það hefur gerst að menn hafa dottið. Sett á sig gleraugun og byrjað að fljúga en það næsta sem þeir vita er að þeir liggja kylliflatir á jörðinni,“ segir Helgi Rúnar Sævarsson, atvinnuflugmaður og kappflugmaður.



Helgi er félagi í Félagi íslenskra kappflugmanna sem heldur sitt fyrsta mót á árinu þegar keppt verður með innidrónum í Víðistaðaskóla í dag. Búnar eru fjórar keppnir innanhúss og verður keppt áfram í skólanum til loka maí. Þá verður komið svo gott veður að hersingin fer út í ferskt loft, og þá með stærri dróna, og setur upp braut og keppir utandyra.





Átta hafa tekið þátt í innimótunum í vetur en fyrsta mót ársins fer fram í dag. Myndin er frá jólamótinu sem einkenndist af hraða og var skemmtilegt á ?að horfa.


Helgi segir að það kosti um 60 þúsund að verða sér úti um byrjendapakkann. Er þá allt innifalið. Hægt er að kaupa drónana samansetta en Helgi segir að flestir setji þá sjálfir saman. 





Brautin í Víðistaðaskóla. Innidrónarnir fljúga í gegnum þessi lýsandi hlið á gríðarlegri ferð.


„Við erum átta sem tökum þátt í þessum innimótum. En það eru fleiri sem stunda þetta og hópurinn er stærri, kannski 30-40. Virkir félagar eru þó færri af einhverjum sökum og besta mætingin er 10 í keppni síðastliðið sumar.“ Það er þó nokkur fjöldi miðað við að íþróttin er mjög ung en hún er gríðarlega vinsæl erlendis.



„Það hefur orðið sprenging í áhuga. Erlendis eru vegleg verðlaun í boði og þetta er að verða mjög útbreidd íþrótt. Við erum rétt að byrja hér.



Til er tölvuforrit sem hægt er að nota til að æfa sig í drónaflugi. Þá er bara flogið í tölvunni. Þegar svo kemur að því að fara út þá er viðkomandi langt kominn með þjálfunina – því þá er hann búinn að hrapa svo oft í tölvunni sinni.“





Dróninn kemst á um 100 kílómetra hraða. Drónarnir sem notaðir eru innanhúss eru minni. „Það er ekki eins banvænt. Ef flogið er á einhvern óvænt þá verður það aldrei neitt stórslys,“ segir Helgi. Myndir/Félag íslenskra kappflugmanna


Helgi Rúnar segir að það hjálpi mikið að geta æft sig án þess að skemma dýra hluti. „Í gamla daga þurfti maður að fara út og prófa og yfirleitt skemmdi maður eitthvað og þá tók tíma að laga það.



Jafnvel yfir veturinn getum við verið í tölvunni að æfa okkur og hamast í þessu. Þetta eykur líka nýliðun því það eru margir til í að koma og vera með í þessu. Í gamla daga voru bara allra hörðustu nördar sem voru í þessu en það er breytt í dag.“





Byrjendapakkinn þar sem dróni, gleraugu og fjarstering er með kostar um 60 þúsund krónur.


Helgi er atvinnuflugmaður en segir að reynsla sín úr fluginu nýtist lítið. „Dróninn flýgur allt öðruvísi. Það er himinn og haf þarna á milli.



Dróninn getur stoppað á staðnum og leikið allar hundakúnstir í loftinu á meðan flugvélin fer eftir hefðbundnara þyngdarlögmáli. Þeir sem eru bestir í þessu sporti eru ekki flugmenn. Ástæða þess að ég er í þessu er að ég hef áhuga á öllu sem flýgur.“ 






Fleiri fréttir

Sjá meira


×