Van Gaal tók ekki við Belgum til að hefna sín á United

Louis van Gaal sleppti því að taka við landsliði Belgíu svo Manchester United myndi þurfa að halda áfram að borga honum.

Hollendingurinn var fremstur á blaði þegar ráða átti nýjan landsliðsþjálfara árið 2016, nokkrum mánuðum eftir að hann var rekinn frá United. Svo fór að Roberto Martinez var ráðinn í starfið.

Van Gaal var rekinn eftir tvö ár hjá enska stórveldinu, en hann var á þriggja ára samning. Ef hann hefði tekið við öðru starfi þá hefði hann þurft að gefa upp hluta af laununum sem United skuldaði honum eftir starfslokin.

„Það hefði verið frábært að verða landsliðsþjálfari Belga, en ég var svo gramur og hefndargjarn að ég sleppti því að taka starfið,“ sagði van Gaal í viðtali við De Volkskrant.

„Þetta var heimskulegt af mér, maður á alltaf að hafa íþróttamannslega hegðun í fyrirrúmi. Þetta var ekki um peningana, heldur snérist um að ég var að hefna mín.“

Van Gaal hefur oft rætt um það hversu illa hann kunni að meta hegðun forráðamanna United gagnvart sér en hann segir leikmennina einnig hafa komið illa fram við hann.

„Fyrrum leikmenn United byrjuðu að gagnrýna mig. Sögðu að ég spilaði leiðinlegan fótbolta. Það kom við mig, þetta voru skipulagðar árásir til þess að láta mig missa stjórn á leikmönnunum í búningsherberginu,“ sagði Louis van Gaal.