Erlent

Vetrarólympíuleikarnir gætu þítt frostið

Stefán Ó. Jónsson skrifar
Áramótaávarp Kim Jong-un, leiðtoga Norður-Kóreu, er talið hafa verið óvenju hófstillt. Þannig hafi mátt greina í því sáttatón í garð Suður-Kóreu.
Áramótaávarp Kim Jong-un, leiðtoga Norður-Kóreu, er talið hafa verið óvenju hófstillt. Þannig hafi mátt greina í því sáttatón í garð Suður-Kóreu. Vísir/Getty

Suður-Kóreumenn hafa lýst einskærum vilja til að setjast niður með nágrönnum þeirra í norðri og ræða hið ískalda samband ríkjanna. Viðræðuboðið kemur í kjölfar ummæla Kim Jong-un, leiðtoga Norður-Kóreu, sem sagðist hafa í hyggju að senda íþróttamenn frá ríki sínu á Vetrarólympíuleikana sem fram fara í Suður-Kóreu í febrúar. Fulltrúar ríkjanna ættu því að „hittast hið snarasta og ræða möguleikann“ á þátttöku þeirra.

Forseti Suður-Kóreu tekur boðinu fagnandi og segist líta á það sem tækifæri til að ræða um fleira en Vetrarólympíuleikana; svo sem samband ríkjanna sem ekki er upp á marga fiska.

Sameiningarmálaráðherra Suður-Kóreu lagði til í morgun að viðræðurnar færu fram í borginni Panmunjoum. Hún stendur á landamærum ríkjanna og fram kemur á vef breska ríkisútvarpsins að hún gangi undir nafninu „Vopnahlésborgin.“ Þar hafa margar af fyrri viðræðum ríkjanna farið fram en þær síðust áttu sér stað árið 2015.

Suður-Kóreumenn vona að viðræðurnar geti farið fram þann 9. janúar næstkomandi en ekki er enn vitað hverjir munu verða viðstaddir enda hafa fulltrúar Norður-Kóreu ekki brugðist við boðinu. Miklar vonir eru þó bundnar við hinar hugsanlegu viðræður enda hefur kjarnorkuáætlun Norður-Kóreu tekið stórstígum framförum frá því að fulltrúar ríkjanna settust síðast niður saman.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira