Viðskipti innlent

Tilraunir í eldhúsinu urðu að 30 milljarða viðskiptasamningi: Lykillinn að „djöflast svolítið í þessu“

Kristín Ólafsdóttir skrifar
Sigurður Kjartan Hilmarsson, betur þekktur sem Siggi, stofnandi fyrirtækisins The Icelandic Milk and Skyr Corporation, segir mikilvægt að vera á staðnum ætli menn sér að ná árangri á bandarískum markaði. Þá segir hann að oft og tíðum hafi gengið brösulega að koma framleiðslu sinni, hinu margfræga Siggi‘s skyr, á markað ytra en Siggi hóf söluna á útimarkaði í New York-borg árið 2006.



Sigurður Kjartan Hilmarsson er einn eigenda The Icelandic Milk and Skyr Corporation í New York. Vinsælasta varan, Siggi's skyr, er byggð á íslenskri uppskrift.
Vill ekki tjá sig um kaupverðið

Vísir greindi frá því í dag að franski mjólkurrisinn Lactalis hafi ákveðið að kaupa The Icelandic Milk and Skyr Corporation, sem var stofnað af Sigurði árið 2006 og er að stærstum hluta í eigu Íslendinga.

Kaupverðið fylgdi ekki sögunni í tilkynningu frá fyrirtæki Sigga í dag en samkvæmt heimildum Fréttablaðsins er áætlað að söluverðið kunni að hafa verið í kringum 300 milljónir dala, jafnvirði um 30 milljarða íslenskra króna.

Siggi var gestur þáttarins Reykjavík síðdegis á Bylgjunni í dag. Aðspurður vildi hann ekkert gefa upp um kaupverðið en eignarhlutur Sigga sjálfs í fyrirtækinu er um 25 prósent.

Óx smám saman í New York

Siggi hóf fyrstu tilraunir í skyrgerð jólin 2004 úti í New York og sumarið 2006 hóf hann sölu á skyrinu á útimarkaði á Manhattan og í lítilli ostabúð. Mikið vatn hefur því runnið til sjávar.

„Vissulega er þetta mikið stökk og var brösótt oft á köflum og horfði til beggja átta mjög oft. Eftir að við byrjuðum á markaðnum þá óx þetta bara hérna í New York,“ segir Siggi og bætir við að aukin eftirspurn í Bandaríkjunum eftir hollari mat hafi haft mikið að segja um velgengni skyrsins.

Vörur fyrirtækisins, sem eru seldar undir vörumerkinu Siggi's skyr, eru fáanlegar í um 25 þúsund verslunum í öllum ríkjum Bandaríkjanna.
Fór í heimsókn á hverju ári í átta ár

En hver er lykillinn að því að komast inn á Bandaríkjamarkað?

„Það er náttúrulega alltaf erfitt að segja hver er lykillinn að árangri en þetta tók gífurlegan tíma og mikla vinnu. Ég var mjög lánsamur með mína fjárfesta, þeir voru mjög þolinmóðir og sýndu mikla biðlund þegar ekki gekk vel og gáfu mér tíma til að vinna,“ segir Siggi. Hann tekur samskipti sín við verslunarkeðjuna Publix sem dæmi en Siggi fékk aðeins nýlega inni fyrir vörur sínar hjá keðjunni.

„Ég var búinn að heimsækja þau á hverju ári í átta ár áður en við komumst inn. Þannig að þetta er í raun og veru bara, eins og maður segir á íslensku, að djöflast svolítið í þessu.“

Sjá einnig: Vilja kaupa Siggi's skyr fyrir um 30 milljarða króna

Þá segir Siggi ómögulegt að ætla sér að ná inn á bandarískan markað án þess að vera á staðnum.

„Ef þú ætlar að selja hérna, þá verðurðu eiginlega að vera hérna. Það er að segja að þú verður að hitta fólk reglulega,“ segir Siggi.

„Maður verður að vera á staðnum og koma milljón sinnum og mæta á sýningarnar, mæta á alla fundi sem maður getur, jafnvel þótt líkurnar séu litlar.“

Fullkomin lending

Engar teljanlegar breytingar verða á starfsmannahaldi fyrirtækisins, að sögn Sigga, en hann verður áfram forstjóri fyrirtækisins.

„Þetta var í raun og veru fullkomin lending að geta fengið ávöxtun fyrir mína þolinmóðu fjárfesta og á sama tíma að passa upp á að starfsmennirnir geti haldið áfram þar sem frá var horfið.“

Lactalis, franski mjólkurrisinn sem keypti fyrirtæki Sigga, er eitt allra stærsta mjólkurfyrirtæki í heiminum. Vörur þess eru fáanlegar í 85 löndum og starfa um 75 þúsund manns hjá fyrirtækinu. Ætlað er að árleg velta Lactalis nemi rúmlega 2000 milljörðum íslenskra króna.


Tengdar fréttir

Vilja kaupa Siggi's skyr fyrir um 30 milljarða króna

Eigendur The Icelandic Milk and Skyr Corporation eru í viðræðum við bandaríska fjárfesta um sölu á öllu fyrirtækinu. Virði þess talið vera tæplega 300 milljónir Bandaríkjadala. Eignarhlutur Sigurðar Kjartans Hilmarssonar, stofnanda fyrirtækisins, er um 25 prósent.  

Siggi heldur sig við Norður-Ameríku

Sigurður Kjartan Hilmarsson, eigandi The Icelandic Milk and Skyr Corporation, segir sölu á vörum fyrirtækisins vera í takt við væntingar. Hefur engin áform um að hefja sölu á skyrinu Siggi's í löndum utan Norður-Ameríku.

Mjólkurrisi kaupir Siggi's skyr

Franska mjólkurfyrirtækið Lactalis hefur ákveðið að kaupa The Icelandic Milk and Skyr Corporation,

Skyrið hans Sigga í 25.000 verslunun

Sigurður Kjartan Hilmarsson fagnaði í síðustu viku því að The Ice­landic Milk and Skyr Corporation er nú komið með tveggja prósenta hlutdeild af bandaríska jógúrtmarkaðnum.






Fleiri fréttir

Sjá meira


×