Lífið

Glimmer og gljáandi litir

Þórunn farðaði Önna Láru Orlowska, Miss World Iceland 2016. Glimmer og jarðlitir eru áberandi. MYND/EYÞÓR
Þórunn farðaði Önna Láru Orlowska, Miss World Iceland 2016. Glimmer og jarðlitir eru áberandi. MYND/EYÞÓR
Áramótaförðunin einkennist af glimmeri, gljáandi augnskuggum og fallegum varalitum, að sögn Þórunnar Maríu Gizurardóttur. Hún farðaði Önnu Láru Orlowska með nýjustu tískulitunum.

„Smekkur fólks á förðun er auðvitað mjög fjölbreyttur en um áramót er glimmer, glans og glamúr alltaf áberandi, Mér finnst rauður varalitur bæði fallegur og sígildur. Sjálf er ég mikið fyrir fjólubrúna varaliti eða liti í þeim dúr. Þeir fara flestum vel og draga fram bros og svipbrigði. Augnskuggar í jarðtónum, t.d. brúnir og vínrauðir, koma vel út í skyggingu í ytri augnkrók,“ segir Þórunn María Gizurardóttir förðunarfræðingur um áramótaförðunina 2017.

Þórunn María hafði lengi haft áhuga á förðun og fikraði sig áfram í listinni með því að fylgjast með förðun á samfélagsmiðlum og á YouTube. „Ég ákvað svo að skrá mig á námskeið í Reykjavík Makeup School í janúar í fyrra og útskrifaðist þaðan í júlí sama ár, með diplóma í förðunarfræði. Þetta var frábær tími og ég eignaðist margar góðar vinkonur í náminu. Ég hef fengið fullt af flottum tækifærum eftir útskrift, ég farðaði t.d. keppendur í Ungfrú Ísland bæði 2016 og 2017 og það var mjög skemmtileg reynsla,“ segir hún.

Byrja á augnsvæðinu

Margar konur fara í förðun fyrir áramótagleðina en flestar mála sig sjálfar. Spurð um ráð varðandi förðun segist Þórunn María mæla með því að byrja að mála sig í kringum augun. „Sérstaklega ef þú ætlar að nota augnskugga því þeir eiga til að dreifast á húðina undir augunum þegar þeim er blandað út með bursta. Mín rútína varðandi förðun er þannig að ég byrja á að setja á mig gott rakakrem og farðagrunn. Síðan móta ég augabrúnirnar og set á mig augnskugga. Ég dusta burt augnskuggann sem dreifist undir augun áður en ég ber farða á húðina. Síðan set ég gerviaugnhárin á og enda á vörunum.“

Tískan á samfélagsmiðlum

Þórunn María fylgist vel með nýjustu tísku í förðun, ekki síst á samfélagsmiðlunum. „Flestir af virtustu förðunarfræðingunum eru bæði með Instagram og Snapchat og leyfa fólki að fylgjast með sér á þeim miðlum. Síðan finnst mér gaman að kíkja í tískublöð af og til og fæ gjarnan hugmyndir þaðan. Ég og Sara, annar eigandi Reykjavík Makeup School, sáum einmitt um förðun og hár fyrir tímaritið Nýtt Líf á seinasta ári en ég fékk mikinn innblástur þaðan til dæmis um „fashion“­ förðun.“



Hægt er að fylgjast með Þórunni Maríu á Instagram undir nafninu thorunnmariamua.






Fleiri fréttir

Sjá meira


×