Viðskipti erlent

Viðskiptastríð að hefjast vegna þotu Bombardier

Kristján Már Unnarsson skrifar
Bombardier-þotan í flugtaki á Reykjavíkurflugvelli haustið 2016 á leið vestur um haf eftir flugprófanir í Evrópu.
Bombardier-þotan í flugtaki á Reykjavíkurflugvelli haustið 2016 á leið vestur um haf eftir flugprófanir í Evrópu. Stöð 2/Baldur Hrafnkell Jónsson.

Ríkisstjórnir Kanada og Bretlands hafa hótað Bandaríkjamönnum viðskiptastríði eftir að ríkisstjórn Trumps Bandaríkjaforseta boðaði nærri þrjúhundruð prósenta verndartoll á nýjustu Bombardier-þotu Kanadamanna. Fjallað var um málið í fréttum Stöðvar 2. 

Íslendingar kannast við Bombardier-nafnið í gegnum innanlandsflugið. En kanadíski flugvélaframleiðandinn heldur sig ekki bara við litlar flugvélar. Á Reykjavíkurflugvelli í fyrra sást nýjasta stolt Kanadamanna, Bombardier CS 300-þotan, þá nýkomin úr flugprófunum, en hún þykir henta einkar vel fyrir litla miðborgarflugvelli, þarf stuttar brautir og er sögð hljóðlátasta farþegaþota heims. 

Þotan virðist ætla að slá í gegn því flugfélög víðs vegar um heim hafa þegar pantað 360 eintök, félög eins og Lufthansa og Swissair, og næststærsta flugfélag Bandaríkjanna, Delta Air Lines, pantaði 75 eintök.

Swissair er meðal þeirra flugfélaga sem keypt hafa Bombardier-þotuna.

En þar með var bandaríska flugvélarisanum Boeing nóg boðið. Boeing kvartaði til Bandaríkjastjórnar og sagði Bombardier-þotuna njóta óeðlilegra ríkisstyrkja bæði frá stjórnum Kanada og Bretlands, en auk starfa í Montreal skapar framleiðsla þotunnar um eittþúsund störf í verksmiðju Bombardier í Belfast á Norður-Írlandi. 

Trump forseti var minntur á kosningaloforð sín um að vernda innlendan iðnað og nú hefur viðskiptaráðuneyti Bandaríkjanna tilkynnt að refsitollur upp á 292 prósent verði settur á Bombardier-þotuna. Tollurinn tekur gildi við staðfestingu Alþjóðaviðskiptastofnunar Bandaríkjanna, sem búist er við á næstu vikum. 

Kanadastjórn hefur þegar brugðist við með því að afturkalla pöntun í átján herþotur frá Boeing. Theresa May, forsætisráðherra Bretlands, hefur einnig hótað Bandaríkjamönnum viðskiptastríði, og lýst því yfir að pantanir breska hersins hjá Boeing geti sömuleiðis verið í uppnámi. 

Fréttaskýrandi The Economist segir ásakanir Boeing lykta af hræsni, þar sem fyrirtækið njóti sjálft milljarða dollara ríkisstuðnings í gegnum rausnarlega samninga við bandaríska herinn, og spáir því að málið eigi eftir að skaða Boeing enn frekar. Vitnað er til forsvarsmanna flugfélaga sem segjast fremur velja Airbus ef Boeing hætti ekki að níðast á Bombardier. Boeing hafi í þessu máli hegðað sér eins og grenjandi smákrakki. 

Hér má sjá frétt Stöðvar 2:


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
SKEL
2,43
29
1.532.261
REITIR
1,11
11
277.673
HAGA
1,11
20
569.875
GRND
1,1
7
96.059
EIM
0,96
3
26.619

Mesta lækkun dagsins


Félag
Br.%
Fjöldi
Velta*
ICEAIR
-0,91
12
96.089
VIS
-0,04
2
21.202
REGINN
0
2
26.745