Innlent

Hafa trú á að Alþingi leiðrétti kjör örorkulífeyrisþega

Ingvar Þór Björnsson skrifar
Þuríður Harpa Sigurðardóttir segir að jákvæður tónn sé í viðræðum bandalagsins við stjórnvöld.
Þuríður Harpa Sigurðardóttir segir að jákvæður tónn sé í viðræðum bandalagsins við stjórnvöld. Vísir/Hanna
Þuríður Harpa Sigurðardóttir, formaður Öryrkjabandalags Íslands, átti fund með Ásmundi Einari Daðasyni, félags- og jafnréttisráðherra, í vikunni ásamt fleiri fulltrúum ÖBÍ. Það fóru fulltrúar bandalagsins yfir tillögur þess um úrbætur í málefnum öryrkja og fatlaðs fólks. Ráðherranum var einnig afhent minnisblað þar sem tillögur bandalagsins voru settar fram með rökstuðningi.

Í fréttatilkynningu frá Öryrkjabandalaginu er bent á að ráðamenn hafi lýst yfir auknum fjárframlögum til heilbrigðismála, menntamála og samgöngumála, sem sé góðra gjalda vert, en hafi skilið málaflokk þeirra eftir. „Hins vegar hafa ekki komið yfirlýsingar um aukin framlög til almannatrygginga og annarra málaflokka sem heyra undir félags- og jafnréttisráðherra,“ segir í tilkynningunni.

Vilja sjá tekju- og eignarmörk hækkuð

„Skerðingar, króna á móti krónu, verður að afnema strax og það er margt fleira sem við leggjum áherslu á að verði að veruleika í fjárlagavinnu Alþingis. Við viljum sjá tekju- og eignarmörk hækkuð og lífeyri almannatrygginga hækka verulega svo fólk geti framfleytt sér í íslensku samfélagi,“ segir Þuríður. Þá nefnir hún jafnframt að nauðsynlegt sé að lögfesta NPA, notendastýrða persónulega aðstoð, fyrir áramót.

Jákvæður tónn í viðræðum við stjórnvöld

Segir hún að jákvæður tónn sé í viðræðum bandalagsins við stjórnvöld og að samtalið sé lifandi. „Það er fagnaðarefni í sjálfu sér, sem og sú staðreynd að sérstaklega er fjallað um þessi máli í stjórnarsáttmálanum. Vonandi hefur það í för með sér að við náum okkar markmiðum. En það þarf strax að grípa til aðgerða og við verðum að sjá þess merki í fjárlögum næsta árs,“ segir Þuríður.

„Öfugt við laun á vinnumarkaði hafa tekjur örorkulífeyrisþega rýrnað flest undanfarin ár. Helmingur þessa hóps hefur heildartekjur undir 272 þúsund krónur á mánuði og hópur fólks hefur heildartekjur undir 80.000 krónum, svo dæmi sé tekið. Fjölmargir búa við sára fátækt og óviðunandi lífsafkomu. Það blasir við að auka verður framlög til málefna fatlaðs fólks og öryrkja.“




Fleiri fréttir

Sjá meira


×