Viðskipti innlent

Fyrrverandi forstjóri Fáfnis: „Þetta hefur snert æru mína og haft áhrif“

Daníel Freyr Birkisson skrifar
Steingrími Erlingssyni var vikið úr starfi sem framkvæmdastjóri Fáfnis Offshore árið 2015.
Steingrími Erlingssyni var vikið úr starfi sem framkvæmdastjóri Fáfnis Offshore árið 2015. Biokraft

Aðalmeðferð í máli Steingríms Erlingssonar gegn Fáfni Offshore fór fram í Héraðsdómi Reykjavíkur fyrir helgi. Honum var vikið úr starfi undir lok árs 2015 sem framkvæmdastjóri félagsins, en það stofnaði hann árið 2012.

Hann krefur fyrrverandi vinnuveitanda sinn um ógreidd laun og orlof. Fáfnir stefnir Steingrími með gagnkröfu fyrir trúnaðarbrot og að hafa tekið með sér lausa muni í eigu félagsins.

Skoðanaágreiningur sem leiddi til uppsagnar
Fréttablaðið greindi frá því í júní á þessu ári að Steingrímur hefði stefnt Fáfni Offshore og krefðist þess að fá greiddan sex mánaða uppsagnarfrest og orlof en honum var sagt upp í desember árið 2015. Samningi hans var síðan rift í lok febrúar og hlaut hann því einungis launagreiðslur fyrir desember- og janúarmánuð.

Ástæða uppsagnarinnar er sögð vera skoðanaágreiningur stjórnar félagsins og Steingríms sem hafði gengið á um nokkurt skeið.

Gagnstefna forsvarsmanna Fáfnis Offshore byggir á því að Steingrímur hafi í kjölfar uppsagnar tekið með sér lausa muni sem skráðir voru í eigu félagsins. Um er að ræða Hewlett Packard borðtölvu, farsíma og sófa.

Í öðru lagi er honum gert að hafa eytt tölvupóstum sem vörðuðu hagsmuni félagsins og ekki afhent öll þau rafrænu gögn sem auðveldað hefðu yfirstandandi samningaviðræður við sýslumanninn á Svalbarða um framlengingu á útgerð olíuleitarskipsins Polarsyssel úr sex í níu mánuði á ári.

Að lokum hafi hann brotið ákvæði ráðningarsamnings um trúnaðarskyldu með því að greina frá stöðu félagsins í Kastljósviðtali en á þeim tíma vann hann af sér uppsagnarfrest

Sjá einnig: Kröfur ganga á víxl í kjölfar brottreksturs stofnanda Fáfnis Offshore

Hvað varð um borðtölvuna?
Steingrímur segist ekki kannast við það að hafa í leyfisleysi tekið tölvuna sem um er rætt. Gagnstefnendur Fáfnis leiddu tvö vitni fyrir dóm, en báðir aðilar störfuðu fyrir Steingrím þegar tekinn var í gegn kjallari á Bárugötu 4, húsnæði í eigu Fáfnis Holdings – félags Steingríms.

Vitnin segja Steingrím hafa nálgast þá að fyrra bragði með borðtölvu af gerðinni Hewlett Packard og beðið þá að afrita gögnin af henni á yfir á lausan harðan disk. Í kjölfarið á hann að hafa sagt þeim að farga henni eða setja í geymslu.

Tölvuna settu þeir í geymslu en afhentu hana forsvarsmönnum Fáfnis síðar meir þegar í ljós var komið að málið færi fyrir dóm.

Polarsyssel er eina olíuleitarskip Fáfnis Offshore. Smíð þess kostaði um fimm milljarða króna. Mynd/Fáfnir

Dularfulla pósthólfið og örlagaríkt Kastljóssviðtal
Í febrúar 2016 fékk Steingrímur fundarboð frá fjármálastjóra Fáfnis Offshore um að vera viðstaddur þegar tölvupósthólfið hans var skoðað. Steingrímur mætti ekki og bar fyrir sig að fundarboðunin hefði verið misvísandi. Dagsetning og vikudagur hefðu ekki passað saman. Hann hafi verið boðaður á föstudegi en mætt samkvæmt mánaðardegi sem var fimmtudagur.

Í kjölfarið tók Fáfnir Offshore yfir netfang Steingríms í samráði við tölvuþjónustufyrirtæki, eftir að rétthafabreyting var gerð. Lögmaður Steingríms segir þó að pósthólfið hafi verið skoðað áður en fundurinn var boðaður. Restin hafi verið leiksýning og ekki skipt máli.

Þann 14. febrúar mætti lögmaður Steingríms á endurboðaðan fund forsvarsmanna Fáfnis þar sem hann afhenti flakkara með gögnum félagsins. Það er mat gagnstefnenda að innihald hans hafi verið lítið sem ekkert og það ekki skipt neinu máli.

Steingrímur hélt áfram sem eini hluthafi Fáfnis Holding eftir uppsögnina og átti hann í gegnum það félag 21 prósent hlut í Fáfni Offshore. Hann segir Kastljósviðtalið ekki hafa ógnað hagsmunum Fáfnis Offshore og að hann hafi einungis stigið fram sem hluthafi en ekki framkvæmdastjóri til þess að greina frá stöðunni, sem þá hafði verið skrifað um í fjölmiðlum.

Í viðtalinu sagði hann hættu á að félagið stefndi í þrot. Forsvarsmenn Fáfnis segja þessi orð hans þvert gegn hagsmunum félagsins og að þau hafi stofnað samningaviðræðum við norska ríkið um framlengingu á leigu Polarsyssel á Svalbarða í hættu.

Hann segir mikla sorg ríkja í hjarta sínu yfir þessu máli.

„Þetta hefur snert æru mína og haft áhrif – það vita allir sem mig þekkja.“

Að lokinni skýrslutöku yfirgaf hann salinn.

Steingrímur er í dag eigandi BioKrafts ehf. sem selur raforku til Orku náttúrunnar, dótturfélags Orkuveitu Reykjavíkur. Fyrirtækið gangsetti tvær vindmyllur í Þykkvabæ árið 2014 og hefur það hug á að reisa fleiri. Greint var frá því í haust skipulagsnefnd Rangárþings ytra hefði ekki gefið leyfi fyrir uppsetningu nýrra og stærri mylla.

Fáfnir Offshore var stofnað af Steingrími árið 2012. Hugmyndin var að láta smíða og reka skip sem nýtast áttu við olíuleit- og vinnslu. Fyrirtækið á skipið Polarsyssel sem kostaði yfir fimm milljarða króna og var þegar það kom hingað til lands dýrasta skip Íslandssögunnar.

Stefnan var jafnframt sett á að gera út olíuþjónustuskipið Fáfni Viking en eins og Fréttablaðið greindi frá í október var fjárfesting í því afskrifuð upp á rúman milljarð króna.


Tengdar fréttir

Félag Steingríms úrskurðað gjaldþrota

Félagið Haldleysi, áður Fáfnir Holding, sem er einkahlutafélag í eigu Steingríms Erlingssonar, fyrrverandi forstjóra Fáfnis Offshore, var í síðasta mánuði tekið til gjaldþrotaskipta.

Segir riftunina ekki hafa áhrif á starfsemi Fáfnis

Norskt skipasmíðafyrirtæki hefur rift samningi sínum við íslenska fyrirtækið Polar Maritime sem er dótturfélag Fáfnis Offshore. Samningurinn var upphaflega gerður við Fáfni. Riftunin hefur ekki áhrif að sögn stjórnarformanns.

Finnst furðulegt að hindra eigi stjórnarsetu hans í Fáfni

Ketill Sigurjónsson, lögfræðingur og umsjónamaður Orkubloggsins, og Davíð Stefánsson, starfsmaður Íslandssjóða, dótturfélags Íslandsbanka, sækjast báðir eftir einu lausu sæti í stjórn Fáfnis Offshore á hluthafafundi í dag.

Forstjóra Fáfnis sagt upp

Steingrími Erlingssyni, forstjóra og stofnanda Fáfnis Off­shore, var sagt upp störfum í vikunni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
NYHR
0,57
1
1.000
EIM
0
4
109.557
REITIR
0
2
78.214

Mesta lækkun dagsins


Félag
Br.%
Fjöldi
Velta*
ICEAIR
-1,66
19
229.275
MARL
-0,94
29
602.892
N1
-0,88
3
44.013
SKEL
-0,74
4
56.050
REGINN
-0,48
1
41.160