Lífið

Átta milljónum fátækari og 135 kílóum léttari

Lilja Katrín Gunnarsdóttir skrifar
Mama June hefur breyst mikið síðustu mánuði.
Mama June hefur breyst mikið síðustu mánuði. Vísir / Getty Images

Raunveruleikastjarnan Mama June Shannon gerði fyrst garðinn frægan í þáttunum Toddlers & Tiaras með dóttur sinni Alönu „Honey Boo Boo“. Í þáttunum var fylgst með nokkrum fjölskyldum sem áttu það sameiginlegt að börn þeirra tóku þátt í fegurðarsamkeppnum fyrir börn. Mama, Alana og fjölskylda þeirra vakti svo mikla lukku að síðar meir fengu þau sinn eigin þátt, Here Comes Honey Boo Boo sem sýndur var á sjónvarpsstöðinni TLC árið 2012 til 2014.

Þættirnir Here Comes Honey Boo Boo fengu vægast sagt hræðilega dóma og var hætt við framleiðslu á þeim árið 2014 þegar grunur kviknaði um að Mama June Shannon væri í sambandi með dæmdum kynferðisafbrotamanni.
 

Spaghettí, smjör og tómatsósa

Mama June, Alana og restin af fjölskyldunni hefur samt náð að halda sér í sviðsljósinu og hefur raunveruleikaþáttamóðirin vakið gríðarlega athygli undanfarið, eftir að hún náði að léttast um 135 kíló, en eitt af því sem var gagnrýnt í sjónvarpsþáttunum um fjölskylduna var holdafar Mama June og rétturinn „sketti“ sem hún bauð fjölskyldu sinni oftar en ekki uppá, en sá réttur inniheldur spaghettí, fullt af smjöri og nóg af tómatsósu.

Mæðgurnar Alana og Mama June áður en sú síðarnefnda breytti um lífsstíl. Vísir / Getty Images

Hrædd á sjúkrahúsinu

Mama June ákvað að breyta lífi sínu í fyrra og að sjálfsögðu var búinn til heil sjónvarpsþáttasería um ferðalag hennar, þættirnir Mama June: From Not to Hot, sem sýndir voru á WEtv. Þættirnir urðu alls sjö talsins og í fyrsta þættinum sást Mama June fara inn á skurðstofu á leið í magaermisaðgerð, eða gastric sleeve surgery. Ástæðan fyrir því að hún vildi léttast og lifa heilsusamlegra lífi var til að líta vel út í brúðkaupi fyrrverandi eiginmanns síns, Mike „Sugar Bear“ Thompson, sem hélt framhjá henni eins og frægt er orðið. 

„Ég á eftir að líta allt öðruvísi út. Ég er líka hrædd,“ sagði Mama June rétt áður en henni var skutlað inn á skurðstofuna.

„Það er mjórri manneskja inní mér“

Raunveruleikaþáttastjarnan lét sér ekki nægja að fara í aðgerð til að losna við aukakílóin heldur réð líka þjálfarann Kenya Crooks sem lét Mama June fjarlægja ýmislegt af heimilinu, eins og nammi og ís. Mama June var oft við það að gefast upp í þessu ferli en hélt ótrauð áfram.

„Að fara í aðgerð er það ógnvænlegasta sem ég hef gert en það er mjórri manneskja inní mér,“ sagði hún í þáttunum From Not to Hot, en bætti við að henni liði betur með breyttari lífsháttum.

„Mér hefur aldrei liðið svona vel áður. Að borða hollt gefur mér meiri orku, sem gerir mér kleift að æfa meira og léttast hraðar.“

Mama June geislar í dag og er nær óþekkjanleg. Vísir / Getty Images

Ætlar ekki í fleiri aðgerðir

Mama June fór ekki aðeins í magaermi til að líta betur út, heldur einnig í brjóstastækkun og aðgerð til að losa sig við lafandi húð á maga, handleggjum og hálsi. Hún þurfti sjálf að borga fyrir allar aðgerðirnar, þó að WEtv hafi fengið að fylgjast með þessu ferli hennar, og nemur heildarkostnaður 75 þúsundum dollara, tæplega átta milljónum króna. Mama June ætlar ekki í fleiri aðgerðir.

Þegar Mama June byrjaði í þessari lífsstílsbreytingu var hún rúmlega 225 kíló. Í dag er hún rétt um 90 kíló og gengur vel að viðhalda þyngd sinni. Og auðvitað er móðirin búin að landa enn, einum raunveruleikaþættinum. Í janúar á næsta ári verður nefnilega frumsýnd önnur sería af Mama June: From Not to Hot. En þar sem Mama June er búin að losa sig við aukakílóin, bregður hún sér í hlutverk fegurðardrottningar og tekur þátt í hinum ýmsu fegurðarsamkeppnum, líkt og dóttirin Alana gerði þegar heimurinn fékk fyrst að kynnast þessum mæðgum. Svona fer sagan í hringi.



Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira