Fótbolti

Allt undir hjá Liverpool í dag

Henry Birgir Gunnarsson skrifar
Jurgen Klopp var yfirvegaður og hress á fundinum í gær.
Jurgen Klopp var yfirvegaður og hress á fundinum í gær. Vísir/Getty

Stuðningsmenn Liverpool þurfa að standa þétt við bakið á sínu liði í kvöld enda er ansi mikið undir hjá félaginu er Spartak frá Moskvu kemur í heimsókn. Þetta er lokaleikur liðanna í riðlakeppninni.

Liverpool er í efsta sæti E-riðils með 9 stig fyrir leikinn. Sevilla er í öðru sæti með 8 stig og Spartak er svo í því þriðja með 6 stig. Liverpool dugar jafntefli til þess að komast áfram í sextán liða úrslit og vinnur riðilinn með sigri. Tapist leikurinn aftur á móti þá er liðið í vondum málum.

Liverpool má ekki tapa

Liverpool og Spartak verða þá bæði með 9 stig en Spartak verður fyrir ofan í töflunni þar sem fyrri leikur liðanna fór 1-1. Sevilla mun að öllum líkindum klára Maribor og þá er Liverpool í þriðja sæti og fer í Evrópudeildina. Ef Sevilla gerir jafntefli og öll liðin enda með 9 stig verður Liverpool einnig í þriðja sæti. Það má því ekkert klikka.

Þakklátur fyrir tækifærið

„Þetta er mjög mikilvægur leikur fyrir okkur. Ég vil ekki gera of mikið úr þessu en leikurinn er mjög stór. Það er mikil spenna og óvissa í gangi. Auðvitað mikil tækifæri líka og ég er þakklátur fyrir þetta tækifæri,“ sagði Jürgen Klopp, stjóri Liverpool, en það verður enginn Adam Lallana í liði Liverpool í kvöld en stjórinn er að fara sparlega með hann þar sem hann er að ná sér í gang eftir meiðsli.

Liverpool hefur ekki tapað leik í riðlakeppninni og mætir til leiks í fínu formi enda ekki tapað í síðustu átta leikjum sínum.
Þannig virkar ekki lífið

„Góðir og slæmir hlutir hafa gerst í riðlakeppninni en þó aðallega góðir. Ég veit að margir segja að við ættum þegar að vera komnir áfram en þannig virkar ekki lífið. Spartak gæti sagt það sama eftir að hafa tapað stigum gegn Maribor. Bæði lið eru sterkari en þau voru er við mættum þeim síðast og þetta ætti því að vera spennandi leikur.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.