Bílar

Hyundai Accent fæst ennþá í Bandaríkjunum og er ódýr

Finnur Thorlacius skrifar
Hyundai Accent af árgerð 2018 er alls ekki ólaglegur bíll.
Hyundai Accent af árgerð 2018 er alls ekki ólaglegur bíll.

Margir Íslendingar muna eftir Hyundai Accent bílnum enda seldist hann í skipsförmum hérlendis á árum áður. Talsvert langt er þó síðan að Accent var til sölu hér og hann orðin æ óalgengari sjón á götum landsins. Það á þó ekki við í Bandaríkjunum en Hyundai býður Accent til sölu vestanhafs og það á afar hagstæðu verði.

Þar fæst Accent á 14.995 dollara, eða 1.585 þúsund krónur og það sem meira er, þar fer bara býsna laglegur bíll. Ef hann væri í boði hérlendis á þessu verði væri um að ræða ódýrasta nýja bíl sem hægt væri að kaupa. Hafa verður þó í huga að bílar eru mun ódýrari í Bandaríkjunum en hér og há vörugjöld og virðisaukaskattur ekki að hafa viðlíka áhrif á endanlegt verð bíla þar.

Ódýrasta gerð Accent er beinskipt, en bíllinn er samt furðanlega vel búinn, með 5 tommu litasnertiskjá, bakkmyndavél, útvarpsstýringar og skriðstilli í stýri, Bluetooth tengingu, rafmagnsrúðum allan hringinn og fjölstillanleg framsæti. Í sinni dýrustu útfærslu kemur hann með margan annan aðstoðar- og lúxusbúnað fæst á undir 2 milljónum króna. Accent býðst aðeins með einni vélargerð í Bandaríkjunum, 1,6 lítra bensívél, 130 hestöfl með 161 Nm togi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira