Bílar

Saab 9-3 rafmagnsbílar rúlla af böndunum

Finnur Thorlacius skrifar
Saab 9-3 frá NEVS er nú rafmagnsbíll með 300 km drægni.
Saab 9-3 frá NEVS er nú rafmagnsbíll með 300 km drægni.

National Electric Vehicle Sweden sem keypti eignir sænska bílaframleiðandans Saab árið 2012 hefur nú hafið framleiðslu Saab 9-3 bílsins aftur. Þessi 9-3 bílar eru frábrugnir framleiðslunni hjá gamla Saab að því leiti að nú eru þeir knúnir rafmagnsmótorum.

National Electric Vehicle Sweden er kínverskt-sænskt fyrirtæki og verksmiðja fyrirtækisins er staðsett í Kína. Framleiðslugeta hennar í fyrstu er 50.000 bílar á ári, en hún verður brátt stækkuð og mun þá geta framleitt 200.000 bíla á ári. Saab 9-3 bíllinn var kynntur árið 2002 og því er um ansi gamlan bíl að ræða en engu að síður hefur fyrirtækið reitt sig á þennan sígilda bíl.

Hann er nú með rafhlöðum sem duga til 300 kílómetra aksturs. Bíllinn er nokkuð vel búinn, meðal annars með smartphone tengingum, innbyggðu WiFi og lofthreinsibúnaði sem hreinsar 99% af mengandi loftögnum, sem reyndar veitir ekki af í þeim skertu loftgæðum sem víða má finna í Kína.

NEVS segir að fyrirtækið hafi þegar fengið 150.000 bíla pöntun frá Panda New Energy sem hyggst bjóða þá bíla til leigu. Er sá kaupsamningur að virði 1.250 milljarða króna. NEVS hyggst bjóða bíla sína í völdum borgum í Evrópu árið 2020 og þá til leigu.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira