Enski boltinn

Gylfi: Íslendingar vita að litla liðið getur alltaf unnið

Ástrós Ýr Eggertsdóttir skrifar
Gylfi Þór Sigurðsson.
Gylfi Þór Sigurðsson. Vísir/AFP
Innkoma Sam Allardyce hjá Everton hefur gefið liðinu neistann sem vantaði sagði Gylfi Þór Sigurðsson í viðtali við BBC Sport.

Everton mætir á Anfield á sunnudag þegar barist verður um Bítlaborgina. Liðið hefur ekki unnið þar í 18 ár.

„Þú ert að tala við Íslending. Við erum minni aðilinn í öllum landsleikjum. Ég veit að allt getur gerst,“ sagði Gylfi Þór.

„Vonandi breytist það um helgina.“



Stutt er síðan Everton var í fallsæti í ensku úrvalsdeildinni, en liðið situr nú í 10. sæti deildarinnar eftir tvo sigurleiki í röð.

„Við vitum hvað hann [Allardyce] vill og hann útskýrir það vel. Hann hugsar vel um leikmennina til að fá það besta út úr þeim. Hann er mjög reyndur og það mun koma sér vel fyrir okkur.“

„Við þekkjum það allir að vera í þeirri stöðu að skipta um stjóra. Þegar einhver nýr kemur inn þá gerist eitthvað. Einhver neisti sem kveikir í manni,“ sagði Gylfi Þór Sigurðsson.




Fleiri fréttir

Sjá meira


×