Myndbandsdómgæsla í enska bikarnum

Enska knattspyrnusambandið mun prufukeyra myndbandsdómgæslu í völdum leikjum ensku bikarkeppninnar.

Myndbandsdómgæsla hefur farið vaxandi í fótboltaheiminum, en ekki skapað sér sess á Englandi enn. Hún var í boði í vináttulandsleikjum Englands í síðasta mánuði en ekki þurfti að grípa til hennar.

Úrvalsdeildarslagur Brighton og Crystal Palace sem fram fer 8. janúar verður fyrsti keppnisleikurinn þar sem myndbandsdómgæslan verður prófuð.

Áætlað er að hún verði svo áfram notuð í völdum leikjum næstu umferða og í undanúrslitum deildarbikarsins.