Erlent

„Þú getur endurtekið ásakanir í sífellu en það gerir þær ekki sannar“

Samúel Karl Ólason skrifar
Anderson Cooper og Janet Porter.
Anderson Cooper og Janet Porter.

Fréttamaðurinn Anderson Cooper á CNN ræddi í gærkvöldi við Janet Porter, talskonu hins umdeilda þingframbjóðanda Roy Moore frá Alabama. Þau tókust hart á í viðtalinu og gagnrýndi Cooper talskonuna fyrir að neita að svara fjölmörgum spurningum sem sneru að umdeildum skoðunum Moore.

Þar að auki ræddu þau um þann fjölda kvenna sem hafa á síðustu vikum sakað Moore um að hafa áreitt þær kynferðislega á áttunda áratugnum, þegar þær voru á táningsaldri en hann á fertugsaldri.

Alls hafa níu konur stigið fram og sagt hann hafa sóst eftir sér. Ein segir hann hafa klætt hana úr fötunum þegar hún var fjórtán ára og káfað á henni. Önnur segir hann hafa reynt að þvinga hana til munnmaka þegar hún var sextán ára.

Sjá einnig: „Þú ert bara krakki og ég er saksóknari“

Porter sagði allar konurnar vera að ljúga og bar hún ásakanirnar saman við mál þar sem þrír íþróttamenn Duke háskólans voru ranglega ásakaðir um að hafa brotið gegn strippara í samkvæmi árið 2006.

„Í fyrsta lagi, þegar við tölum um að trúa konunum, myndi ég spyrja lacrosse íþróttamenn Duke hvort þeir trúi öllum konum sem stíga fram með ásakanir sem þessar.“

Porter neitaði að svara þeim spurningum hvort að Moore trúði því enn að samkynhneigð ætti að vera ólögleg, hvort hann trúði því enn að samkynhneigð væri sambærileg kynlífi milli manna og dýra og hvort að meina ætti múslimum að sitja á þingi.

Einnig neitaði hún að svara spurningum um hvort Moore teldi Barack Obama, fyrrverandi forseta Bandaríkjanna, hafa fæðst í Bandaríkjunum og hvort að árásirnar á Tvíburaturnana hefði skeð vegna þess að bandaríska þjóðin hefði fjarlægst guð.

Þessi í stað sagði hún að Moore trúði því sem stæði í biblíunni. Þá hélt hún því fram að Demókratar, vinstri sinnaðir fjölmiðlar, þrýstihópar sem styðji við fóstureyðingar og George Soros standi á bak við ásakanirnar gegn Moore. Hún sagði Alabama vera hringamiðju frelsis og komandi menningarstríðs.

Þegar Cooper spurði hvort hún gæti að einhverju leyti sannað þessar yfirlýsingar sínar sagði hún að „það sem ríkjandi öfl gera er að búa til falsar ásakanir“.


Tengdar fréttir

Trump lýsir yfir stuðningi við Moore

Fjöldi kvenna hafa á síðustu vikum sakað frambjóðanda Repúblikana til öldungadeildar Bandaríkjaþings í Alabama um að hafa áreitt þær kynferðislega á áttunda áratugnum.

Washington Post afhjúpar heimildarmann sem sakaður er um blekkingar

Kona, sem hélt því fram við blaðamenn bandaríska blaðsins Washington Post að hún hefði sem unglingur orðið ólétt eftir Roy Moore, frambjóðanda úr röðum Repúblíkana, virðist hafa verið hluti af leynilegri aðgerð sem ætluð var að koma óorði á blaðið.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira