Innlent

Húsnæðismál í forgangi: „Leitum allra leiða til að bæta þetta“

Erla Björg Gunnarsdóttir skrifar
Erfitt er að fá húsnæði á höfuðborgarsvæðinu, það dylst engum og síðustu daga hafa fréttir Stöðvar 2 fjallað um hópinn sem verður verst úti vegna ástandsins. Það eru þeir sem búa bókstaflega á götunni. Sumir búa í tjöldum eða tjaldvögnum, einhverjir leita til Gistiskýlisins en aðrir sofa úti - og hefur Frú Ragnheiður, verkefni Rauða krossins, brugðið á það ráð að útdeila svefnpokum og tjalddýnum.

Húsnæðismál eru málefni sveitarfélaga og hefur Reykjavíkurborg borið hitann og þungann í þessum málum þar sem utangarðsfólk og heimilislausir leita til borgarinnar þótt þeir eigi lögheimili í öðrum sveitarfélögum. Enda er engin úrræði eins og gistiskýlið að finna í öðrum sveitarfélögum.

Allir sem fréttastofa hefur talað við síðustu daga, sem starfa við málaflokkinn, eru sammála um að þörf sé á frekari aðkomu ríkisins að málefnum heimilislausra.

Borgin hefur ákveðið að bæta við sextíu milljónum í málaflokkinn en borgarstjóri segir að ríkið þurfi að koma meira að heilbrigðisþættinum, þ.e. vegna þeirra sem eiga við fíknivanda að stríða, geðrænan vanda eða eru orðnir aldraðir.

„Og svo finnst mér skipta mjög miklu máli að það verði ekki hik á nýrri ríkisstjórn að klára þá samninga sem eru langt komnir, um að borgin fái ríkislóðir til að byggja upp á," segir Dagur B. Eggertsson og kallar einnig önnur sveitarfélög að borðinu.

„Þetta er einfaldlega stórt og mjög brýnt samfélagslegt verkefni sem leysist hraðar og betur ef við komum öll að því.“


Nýr félagsmálaráðherra ítrekar að þessi þáttur húsnæðisþjónustunnar sé á hendi sveitarfélaganna. 

„En ég tek undir með þeim sem hafa verið að lýsa áhyggjum af þessu ástandi og mér finnst full ástæða að við sem þjóð tökum utan um þetta og leitum allra leiða til að bæta þetta, það er að segja húsnæðisþáttinn,“ segir Ásmundur Einar Daðason.

Ásmundur Einar hefur aðeins verið stuttan tíma starfandi ráðherra félagsmálaráðherra og mun næstu vikur skoða hvað fyrri ríkisstjórn hefur gert.

Hvernig sérðu fyrir þér að ríkið geti aukið aðkomu sínu að þessum málum?

„Við þurfum að skoða allar leiðir til þess og það er til skoðunar hjá ráðuneytinu, búið að setja það af stað. Það er engin töfralausn en hins vegar verður þetta forgangsverkefni.“

Tengdar fréttir

Nauðsynlegt að koma fólki strax í skjól

Fólki sem er á götunni í Reykjavík verður boðið að flytja inn í íbúðir í borginni og á Víðinesi á næstu dögum og vikum að sögn borgarstjóra, sem segir nauðsynlegt að koma fólkinu strax í skjól. Fréttastofa skoðaði nýtt úrræði fyrir heimilislausa í Kópavogi en fyrsti íbúinn flytur inn næstkomandi föstudag

Sofa í bílakjallara eða ruslageymslu

Heimilislausir einstaklingar í Reykjavík telja borgaryfirvöld hafa brugðist og gagnrýna úrræðaleysi. Þrír einstaklingar hafa komið sér upp tjöldum í Öskjuhlíð og búa þar. Annar maður hefur sofið í bílakjallara Ráðhúss Reykjavíkur í nokkra mánuði.

Fleiri ungir menn í Gistiskýlinu

Sérstakt átaksverkefni hefur komið því til leiða að tólf pólskir utangarðsmenn sem höfðust við í Gistiskýlinu hafa farið til síns heima í áfengismeðferð. Erfiður húsnæðismarkaður veldur því að fleiri eru í erfiðri stöðu. Forstöðumaður Gistiskýlsins segir þörf á fjölbreyttum úrræðum fyrir fjölbreyttan hóp utangarðsmanna.




Fleiri fréttir

Sjá meira


×