Lífið

Jólaspá Siggu Kling - Fiskurinn: Slepptu öllum hraða næstu mánuði

Elsku Fiskurinn minn! Þú hefur allt í höndum þér því þú ert svo dásamlega viljasterkur en þú getur tuðað of mikið yfir sama hlutnum allt of lengi og fattar ekki hvað þú ert pirrandi því þú vilt öllum svo vel.

Þú hefur þá sérstöku náðargáfu að skilja allt í kringum þig og þá mildi að hjálpa öðrum án þess þú skiljir það eða upplifir þannig og hefur mikla náðargáfu í talanda, getur jafnvel talað endalaust en ert samt líka þessi yndislegi hlustandi og maður vill einhvern veginn segja þér öll sín leyndarmál.

Slepptu samt öllum hraða næstu mánuði og alls ekki vera á 150 kílómetra hraða þar sem einungis 70 kílómetra hraði er leyfður. Þú þarft heldur ekki að skemmta öllum í partýinu eða redda öllum í lífinu því núna þarftu bara að vera eins og einkanúmerið á gamla bílnum mínum var: „TO BE“ og þessi setning hefur hjálpað mér rosalega mikið í gegnum lífið.

Þú hefur miklar tengingar við alheiminn sem í raun og veru er bara einn hugur og raunverulega bara ein heild, svo þú skalt bara biðja veröldina um svar. Hentu út spurningunni og vittu til að áður en langt um líður kemur, já, það kemur hugboð. Þegar þú byrjar að nota þessa tengingu og orku og treysta og trúa af einlægni verður lífið svo miklu léttara.

Jólin eru þinn tími og áramótin einnig og þú átt eftir að sameina marga í þessari gleði því þú ert svo hugumstór. Í ástinni þarftu að finna persónu sem skilur þig, alveg sama hvernig þér líður eða í hvernig aðstæðum þú ert. Það er pínulítil streita hjá þeim sem eru á lausu en orka Venusar býr í desember svo einsettu þér að ná í þann sem þú vilt án þess að nota einhverja leiki. Þú ert að fara inn í einstakan tíma svo skilaboðin eru: Einfaldaðu lífið þitt þá fyllistu endalausri orku og gleði.

Frægir Fiskar: Elísabet Ásberg listamaður, Beggi hans Pacasar, Baltasar Kormákur leikstjóri, Díana Ómel fjöllistakona, Árni Johnsen, fyrrverandi þingmaður, Albert Einstein, Sigmundur Davíð Gunnlaugsson forsætisráðherra, Vigdís Hauksdóttir þingkona, Ilmur Kristjánsdóttir leikkona, Svavar Örn engill, Páll Óskar poppstjarna, Katla Sign og Baby Kling, Lína Rut listaperla, Nanna Lovísa dýranuddari.

Setningin þín er: Ekki vera normal það er svo leiðinlegt, svo vertu pínulítið hinsegin (jólatré) – Ég er hinsegin jólatré (Bogomil Font og Milljónamæringarnir)



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira