Sevilla stal stigi á lokamínútunum

Liverpool mistókst að komast áfram í 16-liða úrslit Meistaradeildar Evrópu í kvöld.

Topplið E-riðils mættust á Spáni í kvöld þegar Sevilla tók á móti rauða hernum úr Bítlaborginni.

Það tók gestina innan við tvær mínútur að komast yfir og eftir hálftíma leik var staðan orðin 3-0. Þá leit út fyrir að leikurinn væri búinn.

Heimamenn voru þó ekki á því að leggja árar í bát og skoraði Wissam Ben Yedder tvisvar í seinni hálfleik og hleypti spennu í leikinn.

Stuðningsmenn Liverpool voru farnir að fagna farseðlinum í 16-liða úrslitin þegar Guido Pizarro skoraði jöfnunarmark sevilla á 93. mínútu.

Liverpool spilar því hreinan úrslitaleik um sæti í útsláttarkeppninni við Spartak Moskvu í síðustu umferðinni.