Tottenham slökkti vonir Dortmund

Tottenham gerði út um veika von Dortmund að komast upp úr riðlakeppni Meistaradeildar Evrópu í kvöld.

Liðin mættust í Þýskalandi í kvöld og þurfti Dortmund að vinna, og treysta á að Real Madrid tapaði sínum leik, til þess að eiga möguleika á því að komast í 16-liða úrslitin.

Dortmund byrjaði leikinn betur og leiddi með einu marki í hálfleik eftir að Pierre-Emerick Aubameyang kom heimamönnum yfir á 31. mínútu.

Í seinni hálfleik tók Tottenham leikinn hins vegar yfir. Harry Kane jafnaði leikinn snemma í hálfleiknum og Son Heung-Min kom gestunum svo yfir á 76. mínútu.

Þar við sat og fór Tottenham með 1-2 sigur.

Á sama tíma rótburstaði Real Madrid APOEL á Kýpur, 0-6. Real tryggði sér með sigrinum sæti í 16-liða úrslitunum og skilur Dortmund eftir með sárt ennið.