Innlent

Skýrist á morgun hvort stjórnarsáttmáli klárast um eða fyrir helgina

Heimir Már Pétursson skrifar
Það skýrist á morgun hvort formenn stjórnarmyndunarflokkanna klára stjórnarsáttmála um helgina eða hvort það dregst fram yfir helgi. Formennirnir hafa fundað í Ráðherrabústaðnum í dag og miðar ágætlega að þeirra sögn.

Ef hins vegar á að klára vinnuna á næstu tveimur dögum þyrfti samkvæmt lögum Vinstri grænna að boða flokksráð saman á morgun til að það geti komið saman til fundar á laugardag til að fara yfir stjórnarsáttmálann.

Samkvæmt heimildum fréttastofunnar gæti lokafrágangur allt eins dregist fram yfir helgi og ræður framvinda mála í dag og á morgun miklu um framhaldið. Þá getur veður spilað inn í því áhersla er lögð á að fulltrúar í stofnunum flokkanna af landsbyggðinni komist til fundar þegar þar að kemur en spáð er leiðindarveðri á norður- og austurhluta landsins á næstu dögum.


Tengdar fréttir

Ýmsir hugsi yfir úthringingum forystunnar í flokksráðsmenn

Margir í flokksráði Vinstri grænna fá nú símtöl frá forystufólki í flokknum vegna yfirstandandi viðræðna um myndun ríkisstjórnar. Óvíst er hvort flokksráðið samþykkir málefnasamning verði hann borinn undir ráðið. 




Fleiri fréttir

Sjá meira


×