Innlent

Björgunarsveitarmenn önnum kafnir í ófærðinni á Akureyri

Birgir Olgeirsson skrifar
Akureyri nú á ellefta tímanum í morgun.
Akureyri nú á ellefta tímanum í morgun. Hólmkell Hreinsson

Það hefur verið í nógu að snúast fyrir björgunarsveitarmenn á Akureyri í morgun. Þeir tóku daginn heldur snemma þegar þeir voru ræstir út um klukkan fjögur í nótt til að aðstoða vegfarendur sem sátu í föstum bíl nærri Krossastöðum, norðan megin við Akureyri. 

Björgunarsveitarmenn sneru til baka á Akureyri eftir það útkall og ákváðu í kjölfarið að taka hring um hverfin í Þorpinu. Voru þeir í því aðstoða íbúa þar á milli klukkan sex og átta í morgun. Samkvæmt upplýsingum frá Landsbjörg hafa þeir í raun ekki komist heim eftir þetta útkall í nótt því þeir hafa einnig aðstoðað ökumenn víðs vegar um bæinn sem sitja fastir og voru einnig boðaðir í útkall vegna báts sem var að losna frá bryggju.

Frá Akureyri í morgun. Hólmkell Hreinsson

Björgunarsveitarmenn í Eyjafirði aðstoðuðu einnig vegagerðarbíl sem sat fastur á Lyngdalsheiði rétt fyrir klukkan sjö í morgun. Þegar björgunarsveitarmenn mættu á vettvang varð þeim ljóst að stórvirk tæki þurfti til að losa bílinn og var því bílstjóra og farþega vegagerðarbílsins komið í burtu.

Fallegt um að lítast á Akureyri. Kristín S. Sigursveinsdóttir

Ásamt því að sinna mönnuðum lokunum á vegum eru björgunarsveitarmenn á Austurlandi þessa stundina að aðstoða við leit að hrossum fyrir utan Egilsstaði.

Landsbjörg segir að frá miðnætti hafi björgunarsveitarmenn verið að störfum víðs vegar um landið.

Allt skólahald liggur niðri á Akureyri þessa stundina og er mikil ófærð þar. 



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira