Innlent

18 stiga frost í nótt og gæti orðið enn kaldara

Stefán Ó. Jónsson skrifar
Er metið að fara að falla?
Er metið að fara að falla? Vísir/Sammi

Veðurstofan telur að þó ólíklegt sé að dægurlágmarkshitametið falli í dag sé það þó alls ekki ómögulegt.

Fyrra met var sett í Möðrudal árið 1978 en þá var 24.2 stiga frost. Frost fór niður fyrir 18 stig í nótt sumsstaðar á hálendinu og það herðir dálítið á frosti með deginum að sögn veðurfræðings Veðurstofunnar. Því sé ekki útilokað að frostið kunni að slá fyrra met í dag.

„Það mætti því segja að framvarðasveitir veturkonungs séu á landinu, en þær verða hraktar burt um miðja viku þegar að hvessir úr suðvestri með súld og rigninu vestanlands og hlýnar vel yfir frostmark,“ segir í hugleiðingum veðurfræðingsins.

Annars er hæg norðlæg eða breytileg átt en 5 til 10 m/s austast á landinu. Norðvestan 8 til 13 suðaustantil á morgun en hægari vindur annarsstaðar.

Skýjað með köflum um landið norðanvert og dálítl él með norður- og austurströndinni en léttskýjað syðra. Frost yfirleitt á bilinu 4 til 14 stig.

Veðurhorfur á landinu næstu daga

Á þriðjudag:
Hæg norðlæg eða breytileg átt, en 5-10 m/s við norður- og austurströndina. Skýjað og dálítil él norðantil, en bjartviðri sunnanlands. Frost 2 til 12 stig. 

Á miðvikudag:
Vestan og suðvestan 3-10 m/s. Skýjað og dálítil él norðanlands, en bjartviðri á Suðausturlandi og Austfjörðum. Hlýnandi veður. 

Á fimmtudag:
Suðvestan 8-13 og súld með köflum vestanlands en heldur hægari og bjartviðri austanlands. Hiti 2 til 7 stig. 

Á föstudag:
Suðvestan 8-15 og rigning um landið sunnan- og vestanvert. Hægari vindur og þurrt norðaustanlands. Hiti 4 til 9 stig. 

Á laugardag og sunnudag:
Útlit fyrir ákveðna vestanátt með skúrum um landið vestanvert en áfram þurrt austantil. Hiti 0 til 5 stig.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira