Leikjavísir

Lego Marvel Super Heroes 2: Berja, brjóta, byggja og opna

Samúel Karl Ólason skrifar
Vísir/TTGames

Stærsti galli Lego Marvel Super Heroes 2 er að hann er Lego leikur. Það er reyndar líka helsti kostur leiksins en það er lítið sem ekkert sveigt frá Legoleikja formúlunni sem er orðin frekar þreytt. Í grunninn er hún svona: Berja vonda karla – Brjóta hluti – Nota kubba úr brotnum hlutum til að byggja annan hlut og opna á næsta svæði leiksins – Endurtaka.

Það sem heldur manni samt við spilunina er húmorinn og það að TT Games tekst að halda þessu skemmtilegu, þrátt fyrir endurtekninguna.

Kang The Conqueror er nú að nota Tímasteininn til þess að safna saman herjum af vondum körlum frá öllum tímabilum Marvel heimsins og sigra alheiminn, eins og gengur og gerist. Hann hefur sömuleiðis safnað mörgum borgum frá mismunandi tímum á einn stað og ofurhetjur Marvel eru þær einu sem geta staðið í vegi hans.

Til þess þurfa ofurhetjurnar að safna brotum úr steini sem gerir þeim kleift að fá hjálp frá öðrum og fleiri ofurhetjum og á endanum sigra Kang og laga tímalínuna eða eitthvað. Á leiðinni er hægt að safna legokubbum og öðru til að opna á fleiri hetjur.

Spilarar þurfa líka að spila sömu borðin aftur með nýjum hetjum til að geta náð öllu sem þar er að finna. Ég hef ekki spilað fyrri leikinn en geri fastlega ráð fyrir því að hann sé svo til gott sem alveg eins.

Leikurinn gerist á stærðarinnar opnu korti þar sem spilarar geta flakkað um sem sínar helstu ofurhetjur og tekið í lurginn á sínum uppáhalds vondu körlum. Þetta er hægt að gera einn eða spila með vini á sama skjánum, sem er mun skemmtilegra en að spila einn.

LMSH2 er mjög fyndinn, eins og allir Lego leikir, og ég er í raun farinn að hafa smá áhyggjur af því hvað ég hlæ mikið af þessum leikjum.

Lego leikirinir eru augljóslega að mestu fyrir börn. Það þýðir þó alls ekki að fullorðnir geti ekki haft gaman af þessu líka. Sérstaklega með því að spila með börnum og leysa þrautir leiksins.

Það er erfitt að taka þetta saman að öðru leyti en þvi að ég hef haft gaman af nánast öllum Lego leikjum sem ég hef spilað. Lego Marvel Super Heroes 2 er engin undantekning. Hins vegar er þetta að verða frekar þreytt formúla sem allir leikirnir fylgja eftir.


Tengdar fréttir

Lego Worlds: Byggðu það sem þú vilt

Andrúmsloft LEGO Worlds er nokkuð sérstakt og hann er skemmtilegur. Hann lítur vel út og það er lúmskt skemmtilegt að upplifa heimana sem maður reyndi að byggja, en gat aldrei, þegar maður var krakki.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira