Innlent

Garður og Sandgerði verða sameinuð

Anton Egilsson skrifar
Frá Sandgerðisbæ.
Frá Sandgerðisbæ. Vísir/Stefán

Sveitarfélögin Garður og Sandgerði verða sameinuð og tekur hið sameinaða sveitarfélag til starfa í maí á næsta ári. Íbúar sveitarfélaganna kusu um sameininguna í dag og lágu úrslit fyrir laust upp úr klukkan ellefu í kvöld.

Íbúar beggja sveitarfélaganna samþykktu sameininguna. Í Garði samþykktu 71,5 prósent íbúa sameininguna en 28,5 prósent voru á móti. Í Sandgerði var sameiningin samþykkt með 55,2 prósent atkvæða en 44,8 prósent voru á móti. Kjörsókn var rúm 50 prósent eða 53 prósent í Garði og 55,2 prósent í Sandgerði.

„Þá er það staðfest að nýtt og öflugt sveitarfélag á Suðurnesjum er að verða til. Það eru spennandi tímar framundan,” sagði Ólafur Þór Ólafsson, formaður bæjarstjórnar í Sandgerði, eftir að úrslitin voru kunngerð.

Í tilkynningu kemur fram að níu manna bæjarstjórn verði kosin í maí á næsta ári og í framhaldinu taki hið nýja sveitarfélag til starfa. Íbúar fái þá að kjósa um nafn á nýju sveitarfélagi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira