Fótbolti

HM bikarinn kemur til Íslands

Ástrós Ýr Eggertsdóttir skrifar
Styttan fer á loft í Rússlandi 15. júlí
Styttan fer á loft í Rússlandi 15. júlí mynd/coca-cola

Bikarinn sem veittur verður sigurvegurum Heimsmeistaramótsins í Rússlandi verður á faraldsfæti um heiminn fyrir mótið, eins og oft áður, og í þetta skiptið mun hann hafa viðkomu á Íslandi.

Ísland er eins og alþjóð veit á leiðinni á Heimsmeistaramótið í Rússlandi næsta sumar og hvort sem strákarnir ná í sigur þar eða ekki þá mun bikarinn koma til landsins.

„Við erum himinlifandi yfir því að geta haldið þessu tveggja ára langa íslenska fótboltapartýi gangandi,“ sagði vörumerkjastjóri Coca-Cola á Íslandi, Magnús Viðar Heimisson, í fréttatilkynningu frá Coca-Cola, en heimsreisa bikarsins er í boði fyrirtækisins.

„Bæði karla- og kvennalandsliðin okkar eru í hæsta gæðaflokki þessa stundina og við, aðdáendurnir, eigum að njóta þess! Koma HM-bikarsins til landsins í mars markar upphafið að enn einu fótboltasumrinu á Íslandi. Það verður líka frábært tækifæri fyrir íslensku þjóðina að kíkja aðeins á bikarinn sem strákarnir ætla að koma með heim aftur í júlí!“

Bikarinn fór af stað í Rússlandi í september og mun koma hingað til lands 25. mars 2018.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira