Erlent

Teikning af Tinna og Tobba seldist á rúmar 50 milljónir

Anton Egilsson skrifar
Teikningin sem seldist á uppboðinu í París í gær.
Teikningin sem seldist á uppboðinu í París í gær. Vísir/EPA
Teikning af blaðasnápnum Tinna og og hundi hans Tobba var seld á tæpa hálfa milljón dala eða rúmar 50 milljónir íslenskra króna á uppboði í París í gær. Sky greinir frá þessu.

Teikningin sem um ræðir er úr bókinni Veldissproti Ottókars konungs sem kom út árið 1939 og var í eigu belgíska listamannsins Hergé, eða Georges Remi eins og hann hét í raun, sem gerði blaðamanninn snjalla ódauðlegan í bókum sínum.

Ýmis verk eftir Hergé voru boðin upp á uppboðinu, þar á meðal bækur, rissmyndir og teikningar. Þar seldist einnig upprunaleg teikning Hergé úr Tinnabókinni Dularfulla stjarnan á rúmar 36 milljónir en á meðal þess sem seldist ekki var eintak af Tinnabókinni Eldflaugastöðin sem áritað var af bandarískum geimförum.  

Þetta er ekki í fyrsta skipti sem að munir úr eigu Hergé tengdum Tinnabókunum seljast fyrir háa upphæð. Árið 2011 seldist teikning hans af bardagasenu úr bókinni Leyndarmál Einhyrningsins á rúmar 24 milljónir króna.

Bækurnar um ævintýri Tinna er afar vinsælar um víða veröld en þær urðu alls 24 talsins og voru þýddar á yfir 90 tungumál. Hafa bækurnar selst í yfir 200 milljón eintaka um heim allan.

 




Fleiri fréttir

Sjá meira


×