Innlent

„Með ólíkindum að stúdentar þurfi að standa í slag við háskólann“

Stefán Ó. Jónsson skrifar
Gamli Garður stendur á horni Sæmundargötu og Hringbrautar.
Gamli Garður stendur á horni Sæmundargötu og Hringbrautar.
Stúdentahreyfingin Röskva mun í dag standa fyrir mótmælum við Gamla Garð þar sem endurskoðun Háskóla Íslands á fyrirhugaðri uppbyggingu stúdentagarða verður í brennidepli.

Í tilkynningu frá Röskvu eru málsatvik reifuð. Samkomulag var undirritað í mars árið 2016 um að stúdentaíbúðir yrðu byggðar á reitnum við Gamla Garð ásamt stúdentagörðum á lóð Vísindagarða við Sæmundargötu. Nú sé hins vegar útlit fyrir að hætt verði við uppbygginguna á reitnum á horni Hringbrautar og Sæmundargötu. Eins og Vísir hefur áður greint frá var uppbyggingin umdeild og leggst Minjastofnun til að mynda algjörlega gegn slíkum hugmyndum.

Sjá einnig: Stefnir í harða deilu milli Félagsstofnunar stúdenta og Minjastofnunar

„Háskóli Íslands hefur nú óskað eftir umhugsunarfresti til þess að hægt sé að endurskoða fyrirhugaða uppbyggingu á reit háskólans við Gamla Garð. Röskva bendir á að uppbygging stúdentaíbúða megi ekki við mikilli bið. Bæta þarf aðstöðu nemenda við Gamla Garð, þar á meðal með aðgengi fyrir hreyfihamlaða, og auka þarf framboð á ódýru leiguhúsnæði í nálægð við háskólasvæðið fyrir nemendur háskólans,“ segir í tilkynningunni frá Röskvu.

Jafnframt er bætt við að hreyfingunni þyki „með ólíkindum að stúdentar þurfi að standa í slag við háskólann um uppbyggingu af þessu tagi á lóðum hans - enda er húsnæði forsenda þess að stúdentar um allt land og víða um heim geti stundað nám við Háskóla Íslands.“

Því verði tjaldað við Gamla Garð í dag til að mótmæla fyrirhugaðri endurskoðun.


Tengdar fréttir

Stefnir í harða deilu milli Félagsstofnunar stúdenta og Minjastofnunar vegna nýbygginga á háskólasvæðinu

Minjastofnun leggst alfarið gegn því að hugmyndir Félagsstofnunar stúdenta um byggingu við hlið Gamla Garðs á háskólalóðinni verði að veruleika. Byggingin muni skyggja á og raska einstæðri og mikilvægri skipulagsheild með óafturkræfum hætti. Félagsstofnun segir Minjavernd ekki hafa lögsögu í málinu enda sé Gamli Garður ekki friðaður.




Fleiri fréttir

Sjá meira


×