Lífið

Vetrarspá Siggu Kling – Nautið: Ekki taka ákvarðanir einn, tveir og þrír

Elsku Nautið mitt, þú ert ein eikin og þar af leiðandi oft erfitt að færa þig úr stað. Þú ert svo skapheit týpa og hefur geisla eldsins en hörku klakans, en enginn er tryggari en þú og þess vegna er sá heppinn sem þú elskar. Það er alveg sama hve marga mínusa sú manneskja hefur, þú Nautið mitt, breytir mínus í plús.

Þó að þú hafir mikið afl og sért sterkt, þarftu að róa hugann og ekki taka ákvarðanir einn, tveir og þrír því það er eitthvað svo endanlegt þegar þú tekur ákvörðun. Það verður eitthvað svo erfitt að hnika þér til svo slepptu allri valdabaráttu og sýndu frekar eins mikla mildi og þú getur.

Ekki láta alla vita hversu þrjóskt þú ert, heldur skaltu tileinka þér að gefa þeim tækifæri sem eru algjörlega á annarri skoðun en þú. Þú átt eftir að fyrirgefa þó að fólk sé ruddalegt í kringum þig því það er í eðli þínu að gefa öðrum séns og þú ert alltaf að hjálpa öðrum með ráðleggingum og speki um hvað þeim gengur vel, hvað þeir líta vel út og annað.

Þetta kallast kærleikur, því þú elskar af lífi og sál og breiðir ástina út, en hættu að gráta þó þér finnist eitthvað hversdagslegt eða leiðinlegt. Þú verður að sjá að ömurlegt veður eða mikil sól eru bara eins og kaflaskipti í lífi þínu. Þig langar náttúrulega að hafa alla kaflana ánægjulega eða ástúðlega en þú lærir ekkert á því, svo þú skalt bara nota hugrekki þitt og staðfestu í að ráðast á það sem hindrar þig, annars verðurðu bara fórnarlamb.

Þú ert algjört goð eða gyðja og gefur öðrum andlega uppbyggingu og þess vegna þarftu líka að sýna að þú getir skipt um skoðun á mönnum eða málefnum. Pláneta velgengninnar, sem er Júpíter, er svo sterk inni í orkunni þinni og gefur þér heppni. Þú þarft samt aðeins að hafa fyrir þessu sem er að gerast hjá þér á næstu mánuðum en fyrst og fremst að taka ákvörðun um hver þú ert og hvert þú vilt fara. Þú leitar að hamingjunni, en ég segi þér hún er beint fyrir framan þig!

Setningin til þín er: Þar sem þú átt heima er hamingjan – Paradise City(Guns N' Roses)

Fræg Naut: Aron Einar Gunnarsson fyrirliði íslenska knattspyrnulandsliðsins, Hannes Þór Halldórsson markvörður, Ari Freyr Skúlason landsliðsmaður, Svali Kaldalóns fjölmiðlamógúll, Guðrún Veiga Guðmundsdóttir, rithöfundur og latikokkur, Ellý Ármanns fjölmiðlakona, Friðrik Þór Friðriksson leikstjóri, Valtýr Björn Valtýsson íþróttafréttamaður, Ólafur Ragnar Grímsson forseti, Álfheiður Ingadóttir þingkona, Halldór Laxness, rithöfundur og skáld, Rúnar Freyr Gíslason leikari, Garðar Thor Cortes söngvari, Helga Möller söngkona, Katrín Tanja Davíðsdóttir crossfit-meistari, Nanna Bryndís Hilmarsdóttir söngkona, Pétur Jóhann Sigfússon, Addi Exos dj-snillingur, Davíð Rúnar Bjarnason, boxari.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.