Innlent

Segja formann Stúdentaráðs vanhæfan til að fjalla um nýja stúdentagarða

Hulda Hólmkelsdóttir skrifar
Ragna Sigurðardóttir, formaður Stúdentaráðs Háskóla Íslands.
Ragna Sigurðardóttir, formaður Stúdentaráðs Háskóla Íslands.

Vaka – félag lýðræðissinnaðra stúdenta við Háskóla Íslands, hefur lýst yfir vantrausti á Rögnu Sigurðardóttur, formann Stúdentaráðs skólans, í máli er varðar byggingu nýrra stúdentagarða við Gamla Garð við Hringbraut.

Stúdentaráðsliðar Vöku krefjast þess að Ragna víki sem fulltrúi nemenda úr samráðshópi Háskóla Íslands, Reykjavíkurborgar og Félagsstofnunar stúdenta um málið.

Í ályktun frá Vöku segir að Ragna hafi verið tvísaga í málflutningi og afstöðu sinni vegna málsins.

„Stúdentar verða að geta treyst því að formaður Stúdentaráðs standi með þeim í svo stóru máli en láti ekki þrýsting annarra ráða um afstöðu sína.“

Ragna Sigurðardóttir gegnir embætti formanns Stúdentaráðs í umboði Röskvu og þá situr hún einnig fyrir hönd nemenda í Háskólaráði, sem er æðsta ákvörðunarvald háskólans.

Í ályktun Vöku segir að þann 23. ágúst síðastliðinn hafi Stúdentaráð samþykkt, með stuðningi bæði Röskvu og vöku, bókun sem send var Háskólaráði þar sem þrýst var á ráðið að standa við ákvörðun um byggingu stúdentagarða við Gamla Garð.

Hafi ekki framfylgt afstöðu Stúdentaráðs
Þann 7. september hafi Ragna hins vegar samþykkt á fundi Háskólaráðs bókun þess efnis að endurskoða ætti ákvörðun um byggingu stúdentagarða á reitnum í ljósi afstöðu Minjastofnunar og Húsafriðunarnefndar.

„Með atkvæði formanns Stúdentaráðs með bókuninni verður ekki annað skilið en að hún láti álit Minjastofnunar og Húsafriðunarnefndar vega þyngra en hagsmuni stúdenta, þvert á yfirlýstan vilja Stúdentaráðs,“ segir í ályktun Vöku.

Þar segir einnig að á Stúdentaráðsfundi þann 25. September hafi Ragna ekki upplýst ráðið um bókun Háskólaráðs, né atkvæðagreiðslu sína með henni. Í október hafi svo verið stofnaður samráðshópur HÍ, Reykjavíkurborgar, FS og nemenda til að fjalla um byggingu stúdentagarðanna. Hópnum var gert að skila niðurstöðu við árslok sem lögð verður fyrir Háskólaráð.

„Með stofnun þessa hóps er ljóst að ákvörðun í málinu mun dragast verulega og frekari seinkanir verða á uppbyggingu stúdentagarða fyrir nemendur. Formaður Stúdentaráðs hefur tilkynnt Stúdentaráði að hún muni taka sæti í hópnum sem fulltrúi nemenda. Í ljósi þess að hún hefur ekki framfylgt afstöðu Stúdentaráðs í málinu fram til þessa leggst Vaka alfarið gegn því að svo verði.”

Málinu frestað
Vaka fór fram á að haldinn yrði stúdentaráðsfundur sem allra fyrst vegna málsins og fór sá fundur fram í gær.

„Í krafti fjölda síns þvinguðu fulltrúar Röskvu hins vegar fram frestun á málinu og var Stúdentaráðsliðum í kjölfarið meinað að ræða málið, þrátt fyrir að fjöldi þeirra væri á mælendaskrá. Meirihluti Stúdentaráðs, skipaður fulltrúum Röskvu, bar fyrir sig skort á upplýsingum og skamman tíma til að kynna sér málið. Öll gögn í málinu lágu þó fyrir á Stúdentaráðsfundi þann 23. ágúst þegar Stúdentaráð samþykkti bókun um málið. Síðan þá hefur aðeins bæst við bókunin frá Háskólaráði sem er aðgengileg öllum stúdentum og formaður ráðsins hefði átt að gera Stúdentaráði grein fyrir á Stúdentaráðsfundi 25. september en kaus að gera ekki,“ segir í tilkynningu frá Vöku.

Vaka segir það nauðsynlegt að fleiri stúdentagarðar rísi sem fyrst, þar sem þúsund stúdentar bíði eftir húsnæði. Þá stóðu félagar í Röskvu fyrir mótmælum við Gamla Garð í síðustu viku þar sem endurskoðun á byggingu stúdentagarðanna var í brennidepli.


Tengdar fréttir

Stefnir í harða deilu milli Félagsstofnunar stúdenta og Minjastofnunar vegna nýbygginga á háskólasvæðinu

Minjastofnun leggst alfarið gegn því að hugmyndir Félagsstofnunar stúdenta um byggingu við hlið Gamla Garðs á háskólalóðinni verði að veruleika. Byggingin muni skyggja á og raska einstæðri og mikilvægri skipulagsheild með óafturkræfum hætti. Félagsstofnun segir Minjavernd ekki hafa lögsögu í málinu enda sé Gamli Garður ekki friðaður.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira