Erlent

Kosningar og fellibylur í Japan: Útgönguspár gera ráð fyrir sigri Shinzo Abe

Kristín Ólafsdóttir skrifar
Shinzo Abe, forsætisráðherra Japans, mun að öllum líkindum endurnýja umboð sitt í nýafstöðnum kosningum. Hann ræðir hér við blaðamenn eftir að kjörstaðir lokuðu klukkan 20 að japönskum tíma í dag.
Shinzo Abe, forsætisráðherra Japans, mun að öllum líkindum endurnýja umboð sitt í nýafstöðnum kosningum. Hann ræðir hér við blaðamenn eftir að kjörstaðir lokuðu klukkan 20 að japönskum tíma í dag. Vísir/afp
Útgönguspár í Japan gera ráð fyrir yfirburðasigri forsætisráðherra landsins, Shinzo Abe, í nýafstöðnum þingkosningum en kjörstaðir lokuðu klukkan ellefu í morgun að íslenskum tíma. Fellibylurinn Lan, sem búist er við að gangi á land aðfararnótt mánudags, hefur gert kjósendum erfitt fyrir á einhverjum svæðum.

Íslendingur, sem staddur er í japönsku borginni Osaka, segir lífið ganga sinn vanagang þrátt fyrir óveður og kosningar.

Fær umboð til að bregðast við ógninni

Forsætisráðherra Japans, Shinzo Abe, boðaði til óvæntra þingkosninga þann 25. september síðastliðinn, rúmu ári fyrr en áætlað var. Samkvæmt útgönguspám sjónvarpsstöðvarinnar TBS mun flokkur Abe, Frjálslyndir Demókratar, ásamt samstarfsflokknum Komeito, fá 311 sæti af 465 á japanska þinginu. Þannig myndu ríkisstjórnarflokkarnir halda þeim meirihluta sem þarf til að gera breytingar á stjórnarskrá Japans. Talið er að kjörsókn hafi verið um 53,7 prósent.

Stuðningur við ríkisstjórn Abe fór dvínandi í sumar en hefur aukist jafnt og þétt í haust. Þessi aukning hefur meðal annars verið rakin til tíðra vopnaprófana Norður-Kóreu undanfarin misseri en Abe sækist eftir endurnýjuðu umboði kjósenda til að bregðast við kjarnorkuógninni. Þá mun Abe koma til með að hrinda umdeildri skattahækkun í framkvæmd en hann verður auk þess sá forsætisráðherra Japans sem setið hefur lengst í embætti.

Jakkafataklæddur að predika

Kjósendur í milljónatali hættu sér út í hellirigningu og snarpar vindhviður í dag en búist er við því að fellibylurinn Lan gangi á land af fullum þunga á suðurströnd Japans aðfararnótt mánudags. Metfjöldi japanskra kjósenda kaus utan kjörfundar vegna fellibylsins, að því er fram kemur í frétt bandarísku fréttastofunnar CNN.

Trausti Breiðfjörð Magnússon er staddur í japönsku borginni Osaka.Trausti Breiðfjörð Magnússon
Trausti Breiðfjörð Magnússon er staddur í Osaka, næststærstu borg Japans, en hann kom til landsins fyrir tæpum tveimur vikum. Aðspurður segist Trausti ekki hafa tekið eftir miklum viðbúnaði í kringum þingkosningarnar.

„Ég hef varla orðið var við neinn áróður. Í gær sá ég samt einn jakkafataklæddan mann um borð í stórum jeppa að predika eitthvað um kosningarnar,“ segir Trausti í samtali við Vísi. Hann telur veðrið geta spilað þar inn í.

„Það er búin að vera rigning nánast alla þá tólf daga sem ég hef verið i Japan, sem skýrir kannski hvað það er lítið að gerast úti á götum í kringum kosningarnar.“

Lestin stoppuð vegna óveðurs

Varað er við því að fellibylurinn Lan geti valdið miklum flóðum og aurskriðum þegar hann gengur yfir Japan í nótt. Tokyo, höfuðborg Japans, og Osaka, eru meðal þeirra borga sem gætu orðið hvað verst úti í óveðrinu, að því er fram kemur á vef Accuweather. Trausti segir veðrið í Osaka minna sig, enn sem komið er, á leiðinlegan haustdag á Íslandi en áhrifa fellibylsins gætir þó nú þegar í almenningssamgöngum borgarinnar.

Trausti segir margt hafa verið um manninn á yfirbyggðri verslunargötu, þar sem fólk safnaðist saman til að forðast rigninguna.Trausti Breiðfjörð Magnússon
„Lífið gengur auðvitað bara sinn vanagang en það eru augljóslega færri að labba um göturnar. Ég stökk aðeins út í dag til að skoða fræga verslunargötu sem er klædd að ofan með þaki. Þar var rosalega „crowded“ því fólk kemst í skjól frá regninu. Ég var svo á leiðinni til baka með lest seinnipartinn þegar það var ákveðið að allir ættu að fara út þvi það yrði ekki haldið lengra í þessu veðri,“ segir Trausti.

„Kannski eru byggingarnar að skýla manni fyrir þvi versta en já, þetta er svolitið eins og íslenskt haustveður.“ 


Tengdar fréttir

Japanir ganga til kosninga í fellibyl

Forsætisráðherra Japans, Shinzo Abe, boðaði til óvæntra þingkosninga þann 25. september síðastliðinn en talið er að beri sigur úr býtum í kosningunum.

Mikill stuðningur við Abe í könnunum

Nái flokkur Shinzo Abe forsætisráðherra og samstarfsflokkar hans tveimur þriðju þingsæta mun það gefa þeim færi á að gera breytingar á stjórnarskrá landsins.




Fleiri fréttir

Sjá meira


×