Formúla 1

Hamilton: Hræðileg leið til að vinna titilinn

Kristinn Ásgeir Gylfason skrifar
Hamilton sáttur með dagsverkið, þótt leiðin þangað hefði eflaust mátt vera fegurri.
Hamilton sáttur með dagsverkið, þótt leiðin þangað hefði eflaust mátt vera fegurri. Vísir/Getty
Max Verstappen vann í Mexíkó en árangur hans féll í skuggan af fjórða heimsmeistaratitli Lewis Hamilton sem hann landaði í keppninni. Hver sagði hvað eftir keppnina?

„Vonandi gátum við sýnt ykkur skemmtilegan kappakstur í dag, ég átti góða ræsingu en ég veit ekki hvað gerðist í þriðju beygju en ég gaf nóg pláss. Ég vil þakka áhorfendum, þeir sem eru hér eru þeir bestu í heiminum. Þetta er ótrúlegt. Ég er afar þakklátur liðinu og fjölskyldu minni,“ sagði Lewis Hamilton, fjórfaldur heimsmeistari ökumanna í Formúlu 1.

„Þetta var hræðileg leið til að vinna titilinn. Ég var ekkert of árásargjarn í fyrstu beygjunum en ég ætlaði að vera grimmur þar. Ég vil þakka öllum sem standa á bakvið liðið. Ég reyni að snúa öllum steinum við í leit að fullkomnun og hækka alltaf markið. Þetta er erfið braut og það er mjög erfitt að elta hérna og taka fram úr. Ég er afar ánægður með minn fjórða ég er ekki búinn að skipuleggja neitt meira en það,“ bætti Hamilton við.

„Ræsingin var afar mikilvæg og ég hafði betur þar. Eftir það var ég bara að líta eftir bílnum og vanda mig við að aka örugglega í mark,“ sagði Max Verstappen sem vann sína þriðju keppni í dag.

„Ég vil byrja á að óskað Lewis til hamingju. Red Bull bílarnir voru einfaldlega of fljótir í dag. Þetta er magnað umhverfi hér í Mexíkó og ég vil óska liðinu til hamingju með að tryggja sér báða titlana. Þeir eru svo sannarlega verðskuldaðir,“ sagði Valtteri Bottas sem varð annar í dag á Mercedes.

Hamilton var maðurinn sem allt snérist um eftir keppnina.Vísir/Getty
„Upphaflega ræsingin var ekki slæm en ég var óheppinn í ræsingunni, ég fékk ekki sama tog og aðrir niður beina kaflann. Ég hafði svo einfaldlega ekki hraðann til að bæta stöðu mína eftir að ræsingin var afstaðin,“ sagði Kimi Raikkonen sem var þriðji í dag á Ferrari bílnum. Þetta er 90. verðlaunasæti Raikkonen í Formúlu 1.

„Ég hef aldrei verið svona stressaður að horfa á hitamæla og þrýstingsmæla. Hann ók í kringum það allt og bíllinn hélt. Ég vil óska Lewis til hamingju en þetta er stundin hans Max,“ sagði Christian Horner, liðsstjóri Red Bull.

„Ég hataði alla þessa keppni, það gekk illa og hún var löng og það var erfitt að horfa. Við gátum eftir smástund náð áttum og útskýrt ástandið fyrir Lewis. Ég vil sjá atvikið í fyrstu beygju aftur. Ég held að venjulega hefði Vettel fengið refsingu að mínu mati en þetta var keppnin þar sem titillinn var líklegast á línunni,“ sagði Toto Wolff, liðsstjóri Mercedes.

„Ég faðma sjaldan hálfnakta sveitta menn en þetta var gott faðmlag sem við Lewis áttum núna rétt í þessu,“ bætti Wolff við.


Tengdar fréttir

Sebastian Vettel á ráspól í Mexíkó

Sebastian Vettel á Ferrari var fljótastur í dag í tímatökunni fyrir mexíkóska kappaksturinn í Formúlu 1. Max Verstappen varð annar á Red Bull og Lewis Hamilton varð þriðji á Mercedes.

Verstappen: Ég er afskaplega pirraður

Sebastian Vettel náði fimmtugasta ráspól ferilsins í dag þegar hann tryggði sér ráspól fyrir mexíkóska kappaksturinn í Formúlu 1 sem fram fer á morgun. Hver sagði hvað eftir tímatökuna?




Fleiri fréttir

Sjá meira


×