Menning

Syngja á latínu, katalónsku og oksítönsku

Gunnþóra Gunnarsdóttir skrifar
Guðbjörg Hlín, Arngerður María, Lilja Dögg og Alexandra mynda Umbru. Þær nota allar röddina, auk annarra hljóðfæra. Svo fá þær til sín fleira listafólk á tónleika kvöldsins.
Guðbjörg Hlín, Arngerður María, Lilja Dögg og Alexandra mynda Umbru. Þær nota allar röddina, auk annarra hljóðfæra. Svo fá þær til sín fleira listafólk á tónleika kvöldsins.

Það eru fjölbreytt lög sem við flytjum, þar má nefna munkasöngva í rólegri kantinum og hringdansalög,“ segir Alexandra Kjeld, tónlistarkona í kvartettinum Umbru, sem endurvekur katalónska miðaldasöngva í kvöld í Landakotskirkju.
Yfirskriftin er Þeir vilja stundum syngja og dansa og þar er átt við pílagrímana sem höfðu Montserrat-klaustrið í Katalóníu sem fastan viðkomustað á ferðum sínum. Þar fannst handrit með söngvunum á 12. öld.

Í Umbru eru auk Alexöndru sem leikur á kontrabassa þær Arngerður María Árnadóttir á orgeli og keltneskri hörpu, Guðbjörg Hlín Guðmundsdóttir sem strýkur fiðlustrengi og Lilja Dögg Gunnarsdóttir flautuleikari.

Allar syngja þær svo, en á hvaða tungumáli?
„Að megninu til latínu en í handritinu eru líka tvö lög á katalónsku og eitt á oksítönsku, sem er eldgamalt mál frá Suður-Frakklandi,“ upplýsir Alexandra. „Við höfum fengið góð ráð hjá sérfræðingum og Katalóníubúum í sambandi við framburðinn og styðjumst við gamlar upptökur. Leggjumst alltaf í mikla rannsóknarvinnu þegar við förum í svona verkefni. Það hafa margir spreytt sig á að flytja lögin og það er engin ein rétt leið til þess. Maður getur ímyndað sér að þau hafi verið sungin utan klaustursins með öðrum textum. En í þessu tilfelli eru þau sungin til heiðurs Maríu mey.“

Tónleikarnir hefjast klukkan 20. Með Umbru koma fram Þórdís Gerður Jónsdóttir sellóleikari, Kristófer Rodriguez Svönuson slagverksleikari og bassadeild Söngsveitarinnar Ægisifjar.




Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira