Innlent

Veitti viðurkenningar vegna skútubjörgunar

Atli Ísleifsson skrifar
Athöfnin fór fram um borð í varðskipinu Þór.
Athöfnin fór fram um borð í varðskipinu Þór. landhelgisgæslan

Charles D. Michel, aðmíráll og næstæðsti yfirmaður bandarísku strandgæslunnar, sæmdi í morgun skipverja á Árna Friðrikssyni, rannsóknaskipi Hafrannsóknastofnunar, áhöfn flugvélar Isavia, TF-FMS, og starfsmenn í stjórnstöð Landhelgisgæslunnar viðurkenningu fyrir þátt þeirra í að bjarga áhöfn bandarísku skútunnar Valiantí sumar.

Í tilkynningu frá Landhelgisgæslunni segir að athöfnin hafi farið fram um borð í varðskipinu Þór þar sem þeir Michel aðmíráll og Georg Kr. Lárusson, forstjóri Landhelgisgæslunnar, áttu stuttan fund fyrr um morguninn. Michel er staddur á Íslandi í tengslum við Arctic Circle-ráðstefnuna í Hörpu.

„Ingvi Friðriksson skipstjóri á Árni Friðrikssyni, var sæmdur sérstakri viðurkenningu fyrir hugdirfsku (e. Certificate of Valor)en áhöfn skipsins fékk viðurkenningu fyrir störf í almannaþágu (e. Certificate of Public Service). Flugstjóri og flugmaður TF-FMS og varðstjórar og stjórnandi í stjórnstöð Landhelgisgæslunnar voru einnig sæmdir viðurkenningu fyrir störf í almannaþágu.

Bandaríska skútan Valiant lenti í alvarlegum sjávarháska aðfaranótt 26. júlí þegar brotsjór reið yfir hana. Þrír voru um borð. Stjórnstöð Landhelgisgæslunnar nam boð frá neyðarsendi skútunnar djúpt suðvestur af landinu, skammt utan við mörk fiskveiðilögsögunnar. Varðstjórar og stjórnandi í stjórnstöðinni skipulögðu og stýrðu aðgerðum sem leiddu að lokum til þess að skútan fannst og áhöfninni var bjargað.

landhelgisgæslan

Rannsóknarskipið Árni Friðriksson var í þrjátíu sjómílna fjarlægð frá staðsetningu neyðarsendisins og óskaði stjórnstöð LHG eftir því að skipið færi þegar á vettvang. Snemma um morguninn var flugvél Isavia, TF-FMS, var kölluð út til leitar og tókst flugmönnum hennar að miða út fjarskiptasendingar frá skútunni og staðsetja hana með nákvæmum hætti. Var Árna Friðrikssyni í framhaldinu beint á staðinn. Skipstjóri og áhöfn rannsóknarskipsins björguðu mönnunum þremur um borð við krefjandi aðstæður og hlúðu vel að þeim uns hægt var að koma þeim í land nokkrum dögum síðar.

Talsvert var fjallað um málið í fjölmiðlum, bæði hér á landi og í Bandaríkjunum. Fyrr í haust hafði embættismaður í bandaríska sendiráðinu á Íslandi samband við Landhelgisgæsluna og tilkynnti um að bandaríska strandgæslan vildi heiðra þá Íslendinga sem mestan þátt áttu í þessari giftusamlegu björgun þar sem góð samvinna og fumlaus vinnubrögð starfsfólks þessara þriggja stofnana réðu mestu um hve vel fór,“ segir í tilkynningunni.


Tengdar fréttir

„Þakklæti er okkur efst í huga“

Áhöfn skútu sem bjargað var um þrjátíu sjómílur utan við landhelgi Íslands í fyrradag, kom til landsins í dag með rannsóknarskipinu Árna Friðrikssyni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira