Innlent

Jólageit IKEA komin upp stærri en nokkru sinni fyrr

Hulda Hólmkelsdóttir skrifar
Það er vonandi að þessi átta metra háa geit fái að lifa veturinn.
Það er vonandi að þessi átta metra háa geit fái að lifa veturinn. Vísir/Ernir

Frægasta geit landsins, jólageit IKEA er kominn á sinn stað fyrir utan verslun IKEA í Garðabæ. Hún er stærri en nokkru sinni fyrr, um átta metrar á hæð og er mörg tonn á þyngd. Samhliða því að geitin fari á sinn stað koma jólin í IKEA.

Geitin er strágeit og tilheyrir sænskri jólahefð sem kallast Gävlebocken. Gävle, borið fram sem Jevle, er bær í Svíþjóð. Geitin þar í bæ er sú frægasta en hún hlýtur oftast þau örlög að verða brennuvörgum að bráð. Íslenskir brennuvargar hafa eins og þeir sænsku verið duglegir að kveikja í henni á seinustu árum.

„Hún er náttúrulega mörg tonn á þyngd. Hún er stærri en nokkurntíman fyrr. Hún var sex og hálfur meter í fyrra og nú er hún átta metrar, það er þriggja hæða hús,“ segir Þórarinn Ævarsson, framkvæmdastjóri IKEA, í samtali við Vísi.

„Jólin eru að byrja líka í dag hjá okkur. Það er verið að leggja lokahönd á skreytingarnar. Við höfum alltaf miðað við 15. október.“

Sigga Heimis iðnhönnuður hafði umsjón með gerð vetrarlínu IKEA í ár. Þórarinn segir að minna hafi borist af línunni til Íslands heldur en fyrirtækið hefði viljað. Þau voni þó að hægt sé að panta meira og fleiri geti þannig nælt sér í jólahönnun Siggu.

Erfitt líf IKEA geitarinnar

Jólageitin hefur eins og áður segir verið sett upp árlega seinustu níu ár en oftar en ekki hefur líftími hennar verið styttri en ætlast var til.

Árið 2010 var greint frá því að kveikt hefði verið í jólageitinni. Slökkvilið kom á vettvang tíu mínútum síðar en þá voru brennuvargarnir á bak og burt. Þeir stóðust hins vegar ekki mátið og snéru til baka til að fylgjast með eldinum sem þeir höfðu kveikt. Þá var lögreglan hins vegar mætt og handtók þá undir eins. Forsvarsmenn IKEA buðu mönunum þó það sáttatilboð að sleppa þeim við kæru ef þeir tækju til eftir ósköpin.

Árið 2011 féll jólageitin í miklu óveðri sem þá reið yfir. Geitin skemmdist þó einungis lítillega í óveðrinu og var reist aftur við.

Árið 2012 var jólageitin brennd til kaldra kola öðru sinni. Þórarinn Ævarsson, framkvæmdastjóri Ikea, sagði í samtali við fréttastofu að tjónið væri metið á eina milljón króna.

Árið 2013 var frá því greint að veðrið hafi leikið jólageitina grátt. Mikið rok hafði verið á höfuðborgarsvæðinu og fór sökum þess svo að geitin féll á aðra hliðina.

Á myndbandinu hér fyrir neðan sést þegar kveikt var í geitinni í fyrra.

Dæmd fyrir brunann

Árið 2015 sagði framkvæmdarstjóri IKEA í samtali við Vísi að sólarhringsgæsla væri í kringum geitina til að verja hana frá óprúttnum aðilum.

Það var þó ekki nóg til að bjarga geitinni frá vofveiflegum örlögum sínum en seinna í sama mánuði var greint frá því að jólageitin hefði tortímt sjálfri sér. Kviknaði þá í geitinni út frá útiseríu sem umvafði hana en geitin fuðraði upp á einungis nokkrum sekúndum í kjölfarið.

Í fyrra var fékk geitin að lifa í sirka mánuð. Hún var sett upp um miðjan október líkt og vanalega og brann til kaldra kola aðfaranótt 14. nóvember. Brennuvargarnir, tvær konur og einn karl, voru handtekin á Bústaðavegi og voru í júní síðastliðnum dæmd til að greiða hvert um sig 150 þúsund krónur vegna tjónsins.


Tengdar fréttir

Geitin brunnin

Þrír menn voru handteknir í nótt fyrir að brenna jólageit IKEA til ösku.

Sænska jólageitin fauk um koll

Sænska jólageitin við Ikea liggur nú á hliðinni en svo virðist sem veðrið hafi leikið geitina grátt. En mikið rok er sem stendur á höfuðborgarsvæðinu.

Brenndu jólageit Ikea - milljón króna tjón

"Geitin kostaði milljón,“ segir Þórarinn Ævarsson, framkvæmdastjóri Ikea, en jólageitin var brennd til grunna síðustu helgi, en hún var reyndar einnig brennd niður fyrir tveimur árum síðan.

Jólageitin féll í óveðrinu

Jólageit Ikea féll á hliðina í óveðrinu sem gekk yfir í gærkvöld og í nótt. Kristín Lind Steingrímsdóttir, markaðsstjóri Ikea, segir að geitin sé ekki mikið skemmd. Hún verði reist aftur um leið og veður leyfi, vonandi fyrir hádegi á morgun. Það á ekki af geitinni að ganga því að í fyrra var kveikt í henni.

Kveiktu í jólageitinni fyrir utan Ikea

Margra áratuga gömul sænsk jólahefð barst til íslands í nótt en þá kveiktu brennuvargar í jólageitinni sem staðið hefur fyrir utan Ikea í tvo mánuði. Brennuvargarnir náðust en framkvæmdastjóri Ikea segist í jólaskapi og ætlar ekki að kæra brennuvargana ef þeir hreinsa til eftir sig.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira