Innlent

Bókaútgáfa á bjargbrúninni

Jakob Bjarnar skrifar
Sigmundur Ernir Rúnarsson sjónvarpsmaður og ljóðskáld var fundastjóri, Safnahúsið var fullt og frambjóðendur lofuðu öllu fögru, nema Vilhjálmur Bjarnason.
Sigmundur Ernir Rúnarsson sjónvarpsmaður og ljóðskáld var fundastjóri, Safnahúsið var fullt og frambjóðendur lofuðu öllu fögru, nema Vilhjálmur Bjarnason.

Í gær gengust Rithöfundasamband Íslands og Félag íslenskra bókaútgefenda fyrir fundi með frambjóðendum stjórnmálaflokkanna í Safnahúsinu. Þar var fjallað um stöðu bókaútgáfunnar og kallað eftir neyðaráætlun stjórnvalda í ljósi þess að velta bókaútgáfu hefur dregist saman um hartnær þriðjung á tíu árum.

Skemmst er frá því að segja að bókafólk er himinlifandi með hinar frómu fyrirætlanir sem frambjóðendur í kosningaslag höfðu uppi. Egill Örn Jóhannsson, formaður Félags bókaútgefenda, var kátur þegar Vísir heyrði í honum í morgun.

Hæstánægður með fundinn
„Já, ég er auðvitað hæstánægður með fundinn. Útgefendur og höfundar hafa ekki áður staðið fyrir fundi af þessu tagi þannig að ég vissi ekki alveg út í hvað við vorum að fara. En, við troðfylltum salinn og það sköpuðust fínar og uppbyggilegar umræður og frambjóðendurnir virtust flestir skilja vandann sem við stöndum frammi fyrir og að aðgerða væri þörf.

Egill Örn: Við ljúgum engu til um það að aðgerða er þörf í hvelli ef ekki á að fara verulega illa fyrir íslenskri bókaútgáfu

Egill Örn segir það svo að aldrei sé hægt að vita hverju stjórnmálamenn taka uppá en „það sem gladdi mig mest var hversu afdráttarlausir allir voru um mikilvægi þess að grípa til aðgerða strax. Þessi fundur var neyðarfundur íslenskrar bókaútgáfu og mér fannst ljóst að frambjóðendurnir allir áttuðu sig á því.“

Bókaútgáfa á bjargbrúninni
Þegar formaður Félags bókaútgefenda talar um að grípa til aðgerða er hann að tala um afnám virðisaukaskatts á bækur, frumvarp sem Lilja D. Alfreðsdóttir hefur þegar lagt fram og eru meðflutningsmenn úr öllum flokkum. Hvenær sér Egill Örn fyrir sér að það komi til framkvæmda?

„Ef af verður er nauðsynlegt að þær komi strax til framkvæmda. Við ljúgum engu til um það að aðgerða er þörf í hvelli ef ekki á að fara verulega illa fyrir íslenskri bókaútgáfu. Þetta, eins og stundum er sagt, þolir enga bið. En ég meina það, bókaútgáfa er á bjargbrúninni og jafnvel að verða komin framyfir hana.“

Vilhjálmur Bjarnason ekki í vinsældakeppni
Einn er þó sá maður sem skar sig úr á fundinum, nefnilega Vilhjálmur Bjarnason, fulltrúi Sjálfstæðisflokksins, sem virtist ekki vera í vinsældakeppni á fundinum. Hann var ekki á því að rétt væri að gera breytingar á virðisaukaskattskerfinu. Er það ekki eðlilegt sjónarmið, að vilja standa vörð um að það kerfi sé sem einfaldast?

Vilhjálmur Bjarnason skar sig nokkuð úr hópi frambjóðenda en hann taldi ekki vert að gera breytingar á virðisaukaskattkerfinu.

„Ég virði það við Vilhjálm að vera samkvæmur sjálfum sér. En hann er samt ekki samkvæmur stefnu flokksins, því varaformaður Sjálfstæðisflokksins er meðflutningsmaður frumvarps sem lagt var fram fyrir mjög stuttu um afnám virðisaukaskatts af bókum. Og ég treysti því að það haldi, hvaða skoðun sem að Vilhjálmur kann að hafa.“

Sporin hræða
En, frómt frá sagt, óttastu ekki að þetta sem þarna var sagt af hálfu stjórnmálamanna sé fagurgali í aðdraganda kosninga?

„Jú, ég er logandi hræddur um það satt að segja,“ segir Egill Örn hreinskilnislega.

„En ég er kannski í eðli mínu svartsýnn og mögulega óþarflega svartsýnn. Bjartsýni mín á að að það komi til afnáms virðisaukaskatts og ný ríkisstjórn setji sér alvöru menningarstefnu til langs tíma jókst þó nokkuð eftir fundinn áðan. En auðvitað hræða sporin.“


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.