Formúla 1

Lewis Hamilton á ráspól í Japan

Kristinn Ásgeir Gylfason skrifar
Lewis Hamilton var í sérflokki í dag.
Lewis Hamilton var í sérflokki í dag. Vísir/Getty

Lewis Hamilton á Mercedes var fljótastur í tímatökunni fyrir japanska kappaksturinn í Formúlu 1 og Valtteri Bottas á Mercedes varð annar, Sebastian Vettel á Ferrari varð þriðji.

Tímatakan í Japan er afar mikilvæg, einungis tvisvar frá árinu 1991 hefur ökumaður sem ekki ræsti á frestu rásröð náð að vinna keppnina.

Fyrsta lota
Valtteri Bottas sýndi rallý hæfileika sína þegar hann bjargaði sér og bílnum frá brúarstólpa í fyrstu tilraun Finnans til að setja tíma.

Romain Grosjean gerði mistök og hafnaði á varnarvegg undir lok lotunnar. Það þurfti að stöðva tímatökuna og lotunni lauk þar með. Haas bíll franska ökumannsins var nokkuð skemmdur eftir höggið. Grosjean missti stjórn á bílnum, fór út á gras á um 200 km/klst og þá var eiginlega ekki spurning hvernig leikar myndu enda.

Þeir sem féllu úr leik í fyrstu lotu voru, auk Grosjean, Pierre Gasly á Toro Rosso,Lance Stroll á Williams og Sauber ökumennirnir. Stroll lenti í umferð á brautinni í báðum sínum tilraunum.

Sebastian Vettel á Ferrari mun ræsa annar vegna refsingar Valtteri Bottas vegna gírkassaskiptinga. Vísir/Getty

Önnur lota
Hamilton byrjaði aðra lotuna á því að setja brautarmet á Suzuka brautinni. Raikkonen kom út á mjúkum dekkjum, sem og Bottas en þeir ætluðu greinilega að ræsa keppnina á harðari dekkjum en aðrir fremstu ökumenn. Menn verða að ræsa af stað í keppnina á morgun á þeim dekkjum sem þeir setja hraðasta tímann á í annarri lotu, að því gefnu að þeir komist í þá þriðju.

Þeir sem féllu út í annarri umferð voru Renault ökumennirnir, Stoffel Vandoorne á Mclaren, Kevin Magnussen á Haas og Carlos Sainz á Toro Rosso. Alonso mun taka út refsingu á morgun og færast aftur á ráslínu vegna nýrra vélaríhluta sem hann þarf að taka um borð. Vandoorne mun því ræsa 10. á morgun.

Þriðja lota
Hamilton setti aftur brautarmet í upphafi þriðju lotu. Næstur honum komst Vettel á Ferrari. Bottas, liðsfélagi Hamilton var 0,641 sekúndu á eftir Hamilton eftir fyrri tilraunina í þriðju lotu.

Hamilton bætti svo í tryggði sér ráspól. Bottas nappaði öðru sætinu af Vettel í seinni tilrauninni og Raikkonen var ekki upp á sitt besta og var sjötti.


Tengdar fréttir

Sebastian Vettel mun sleppa við refsingu í Japan

Sebastian Vettel virðist ætla að sleppa við refsingu fyrir nýjan gírkassa í japanska kappakstrinum í Formúlu 1 um komandi helgi. Ferrari hefur staðfest að sá sem hann notaði í Malasíu sé í lagi.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira