Lífið

Marilyn Manson smellti fingri í eista blaðamanns Guardian

Birgir Olgeirsson skrifar
Sviðspersónan Marilyn Manson hefur alla tíð reynt að hneyksla sem flesta.
Sviðspersónan Marilyn Manson hefur alla tíð reynt að hneyksla sem flesta. Vísir/Getty
„Ég mun komast að því hvar þú fokking býrð,“ sagði tónlistarmaðurinn Marylin Manson þegar hann kvaddi blaðamann breska dagblaðsins The Guardian en viðtalið hefur vakið mikla athygli.

Blaðamaðurinn heitir Alexis Petridis en hann birti tíst á Twitter í gær þar sem hann vakti athygli á viðtalinu. Hann sagðist hafa hitt hinn mikla Marilyn Manson. Þeir hafi drukkið saman og Manson hafi smellt hann í eistað með fingri ásamt að stinga upp á því að þeir tveir myndu taka glímu.

„Á meðan við ræddum um muninn á sviðspersónunni hans og hvernig hann er í raun og veru, hallaði Marilyn Manson sér að mér og smellti fingri sínum í eistað á mér,“ skrifar Petridis í upphafi viðtalsins.

Blaðamaðurinn segist hafa upplifað margt í starfi sínu en hafi þó hingað til komist hjá því að viðtalsefni hans snerti á honum kynfærin.



Manson á sviði árið 1997.Vísir/Getty
„Það sem kom mest á óvart er að þessi gjörningur virtist vera hluti af svari hans við spurningu sem snýr að því hvort að sviðspersónan, sem hann skapaði fyrir um aldarfjórðungi, heltaki hann,“ skrifar Petridis og minnist á erfiðleika breska tónlistarmannsins David Bowie við að aðskilja frá Ziggy Stardust.

Viðtalið er afar athyglisvert þar sem þeir ræddu smáheim stjörnunnar, stjórnleysi og sérstöðu einstaklings.

Petridis slapp óskaddaður frá Manson en tónlistarmaðurinn beindi til að mynda gervibyssu í átt að höfði hans en allt var það víst gert í góðu gamni. Kveðja Mansons var til að mynda vísun í lag sem er að finna á nýjustu plötu hans Heaven Upside Down.

Columbine rústaði ferlinum

Marilyn Manson er hugarfóstur hins 48 ára gamla Bandaríkjamanns Brian Hugh Warner. Nafnið Marilyn Manson er fengið frá leikkonunni Marilyn Monroe og fjöldamorðingjans Charles Manson.

Frægðarstjarna Mansons reis hvað hæst á tíunda áratug síðustu aldar þegar hann gaf út plöturnar Antichrist Superstar og Mechanical Animals sem eru hans þekktustu plötur. Ásýnd Manson og hegðun hans opinberlega gerði það að verkum að hann varð afar umdeildur um tíma og sögð afar slæm fyrirmynd fyrir ungt fólk.

Hann ræddi þetta í heimildarmyndinni Bowling for Columbine, eftir Michael Moore þar sem farið var yfir fjöldamorðin í Colombine-skólanum í Bandaríkjunum árið 1999 og ásakanir þess efnis að tónlist Mansons hafi einhvern veginn átt þátt í því.

Í fyrstu var talið að drengirnir tveir sem frömdu ódæðið væru aðdáendur Mansons, en síðar kom í ljós að svo var ekki.

Í viðtalinu í The Guardian segir Manson að Columbine-málið hafi eyðilagt feril hans. Eftir atburðinn fékk hann líflátshótanir daglega og meðal annars hundruð slíkra hótana þegar hann spilaði í Colorado-fylki Bandaríkjanna.






Fleiri fréttir

Sjá meira


×