Formúla 1

Abiteboul: Renault ætlar að tryggja sér fimmta sæti

Kristinn Ásgeir Gylfason skrifar
Cyril Abiteboul og Jolyon Palmer, ökumaður Renault liðsins.
Cyril Abiteboul og Jolyon Palmer, ökumaður Renault liðsins. Vísir/Getty
Cyril Aboteboul, liðsstjóri Formúlu 1 liðs Renault segir að framleiðandinn ætli að gera allt til að tryggja að báðir bílar liðsins klári allar sex keppninar sem eru eftir á tímabilinu.

Renault er í sjöunda sæti í keppni bílasmiða, 10 stigum á eftir Toro Rosso sem er svo sjö stigum á eftir Williams í fimmta sæti. Renault ætlar sér að nappa fimmta sætinu af Williams liðinu.

Renault hefur átt við óáreiðanleika að stríða sem hefur komið sér illa í stigasöfnun liðsins. Nú síðast féll Nico Hulkenberg úr leik í Singapúr vegna olíuleka.

„Það helsta sem er jákvætt úr Singapúr kappakstrinum er að við færðum okkur upp um sæti í heimsmeistarakeppni bílasmiða. Endanlegt markmið okkar er fimmta sæti í keppni bílasmiða,“ sagði Aboteboul.

„Áreiðanleiki er okkar helsta markmið, við viljum eiga gallalausa frammistöðu liðsins og það í öllum sex keppnunum sem eftir eru í ár,“ bætti Abiteboul við.

„Við ætlum okkur að hafa báða bíla í stigasæti því við höfum sýnt að við getum verið bestir á eftir topp þremur liðunum,“ hélt Abiteboul áfram.

Abiteboul staðfesti að auki að Hulkenberg muni nota sína fjórðu vél og síðustu án þess að fá refsingu fyrir.

„Við munum nota nýja vél í bíl Nico, í upphafi helgarinnar, það er hans fjórða vél á árinu,“ sagði Abiteboul að lokum.


Tengdar fréttir

Bílskúrinn: Straumhvörf í Singapúr

Lewis Hamilton kom inn í keppnishelgina, frekar niðurlútur og bjóst ekki við miklu úr keppninni, sem hann vann svo. Með því tók hann mikið forskot í heimsmeistarakeppnni ökumanna.

Sjáðu árekstur Ferrari manna í Singapúr

Ferrari menn skullu saman í ræsingunni í Singapúrkappastrinum í Formúlu 1. Báðir féllu þeir úr leik og færðu Lewis Hamilton 25 stig á silfurfati.




Fleiri fréttir

Sjá meira


×