Erlent

Fylgisaukningu þjóðernisflokks ákaft fagnað og mótmælt

Margrét Helga Erlingsdóttir skrifar
Fjöldamótmæli brutust út fyrir utan kosningamiðstöð AfD.
Fjöldamótmæli brutust út fyrir utan kosningamiðstöð AfD. vísir/AFP
Þrátt fyrir að Angela Merkel hafi farið með sigur af hólmi í þýsku þingkosningunum í dag, telst það einnig til tíðinda að þjóðernisflokkurinn Valkostur fyrir Þýskaland (AfD) hafi náð eins góðum árangri og raun ber vitni. Úrslit kosninganna eru ljós og hlaut AfD flokkur þjóðernismanna, sem er yst til hægri á hinu pólitíska litrófi, þrettán prósenta fylgi. Flokkurinn þrefaldar þar með fylgi sitt frá því í kosningunum 2013 og er jafnframt þriðji stærsti flokkurinn í Þýskalandi. Fylgisaukning AfD vekur blendnar tilfinningar hjá Þjóðverjum sem bæði hafa fagnað og mótmælt í kvöld. Í kvöld brutust út fjöldamótmæli fyrir utan kosningamiðstöð flokksins.

Mótmælendur létu óánægju sína í ljós fyrir utan kosningamiðstöð AfD og sögðu hvern einasta Berlínarbúa hata þjóðernisflokk AfD.vísir/getty
Þjóðernisflokkurinn hyggst veita Merkel aðhald

Alexander Gauland, einn framámanna AfD flokksins ávarpaði stuðningsfólk sitt þegar línur tóku að skýrast í kvöld. Hann gerði fyrirætlanir flokksins á þinginu að umfjöllunarefni sínu: „Við munum elta þau uppi og við ætlum að endurheimta landið okkar.“

Það liggur fyrir að Angela Merkel á mikið og erfitt verk fyrir höndum. Þjóðernisflokkurinn AfD verður Merkel til trafala. Fyrirfram hefur flokkurinn gefið það út að með fyrstu verkum verði að koma á fót nefnd sem rannsaka eigi þá útlendingastefnu sem Merkel hefur rekið síðastliðin ár. Talsmenn flokksins segjast þess fullvissir að hún hafi brotið margvísleg lög og að það kalli á nánari eftirgrennslan að því er fram kemur á vef BBC.

Um sjö hundruð fylktu liði og mótmæltu þjóðernisflokknum fyrir utan kosningamiðstöð hans í kvöld. Fólkið söng hástöfum: „Allir Berlínarbúar hata AfD“ og „nasistasvín“. þá hafa ýmsir stjórnmálaskýrendur og álitsgjafar gagnrýnt flokkinn harðlega. Dirk Schuck, stjórnmálafræðingur við háskólann í Leipzig, sagði að það væri afar mikilvægt að láta í ljós óánægju því það sé ekkert eðlilegt við það að fasistaflokkur sé kominn inn á þýska þingið.

Marine Le Pen leiðtogi Þjóðfylkingarinnar í Frakklandi fagnar góðum árangri AfD ákaft.vísir.is/getty
Le Pen og Wilders fagna með bandamönnum sínum í Þýskalandi

Á Twittersíðu sinni óskar Marine Le Pen, leiðtogi Þjóðfylkingarinnar í Frakklandi „bandamönnum sínum“ í AfD flokknum til hamingju með góðan árangur. Hún segir niðurstöður kosninganna auk þess vera til marks um vakningu evrópskra þjóða.

Á sama vettvangi tekur Geert Wilders, leiðtogi Frelsisflokksins í Hollandi í sama streng og Le Pen. Wilders tekur mið af árangri þjóðernissinnaðra flokka í síðustu kosningum í Hollandi, Frakklandi, Austurríki og Þýskalandi og segir skilaboðin vera skýr: „Við erum ekki íslamskar þjóðir.“

New York Times greinir frá viðbrögðum Merkel eftir kosningarnar en hún segir að það sé alveg ljóst að hún hafi búist við betri niðurstöðum í kosningunum. Hún segir aftur á móti að hið jákvæða sé að hennar flokkur muni leiða ríkisstjórnina. Hún ætlar að leggja sig fram við að hlusta á raddir þeirra sem kusu þjóðernisflokkinn Valkost fyrir Þýskaland (AfD) og reyna að ná þeim aftur á sitt band með því að „leysa vandamál, taka áhyggjur og ótta þeirra til skoðunar en umfram allt að gera það með því að ástunda góð stjórnmál.“

Fréttin hefur verið uppfærð.


Tengdar fréttir

Pólitískt og sálrænt áfall fyrir Þjóðverja

Þjóðverjar gengu til þingkosninga í dag en samkvæmt útgönguspám eru kristilegir demókratar stærsti flokkurinn fjórða kjörtímabilið í röð. Ríkisstjórnin virðist þó fallin þar sem Jafnaðarmenn vilja ekki áframhaldandi samstarf. Þjóðernissinnar gætu náð um áttatíu mönnum inn á þing gangi spár eftir.




Fleiri fréttir

Sjá meira


×