Veiði

Fyrstu lokatölurnar að koma í hús

Karl Lúðviksson skrifar
Það eru komnar lokatölur úr Norðurá
Það eru komnar lokatölur úr Norðurá Mynd úr safni

Nú er veiðitímabilinu í laxveiðinni senn að ljúka og lokatölurnar úr ánum sem opnuðu fyrstar að detta í hús.

Það er að vísu veitt alveg fram í október í ánum sem eru yfirleitt kallaðar hafbeitarár en í þeim ám má veiða lengur.  Norðurá og Blanda opna fyrstar á hverju ári og þær loka einnig fyrstar svo fyrstu lokatölurnar eru úr þeim.  Það hafa ekki borist lokatölur úr Blöndu en í Norðurá er heildarveiðin á þessu tímabili 1719 laxar sem er tæplega 400 löxum hærri lokatala en í fyrra og verður ekki annað sagt en að endaspretturinn í ánni hafi verið góður en um 300 laxar veiddust síðustu tæpu tvær vikurnar.

Meðalveiðin í Norðurá er 1570 laxar frá árinu 1974.  Mesta veiðin í henni var árið 2013 en þá veiddust 3351 lax og hún hefur oft verið í hærri kantinum samanber árin 2015 með 2886 laxa, 2008 með 3307 laxa og 2005 með 3138 laxa.  Minnsta veiðin í Norðurá var árið 1984 en þá veiddust aðeins 856 laxar í ánni en hún hefur aðeins fjórum sinnum farið undir 1000 laxa heildarveiði.  



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira