Samstarf

Lambakjöt í nýjum búningi

Icelandic Lamb kynnir
,,Með þessari vörulínu viljum við stuðla að því að lamb verði oftar á borðum hversdags og einnig hvetja til aukinnar vöruþróunar í framsetningu lambakjöts,“ segir Hafliði Halldórsson, verkefnastjóri hjá Icelandic Lamb.
,,Með þessari vörulínu viljum við stuðla að því að lamb verði oftar á borðum hversdags og einnig hvetja til aukinnar vöruþróunar í framsetningu lambakjöts,“ segir Hafliði Halldórsson, verkefnastjóri hjá Icelandic Lamb. MYND/STEFÁN

Í kjölfar mikillar fjölgunar erlendra ferðamanna á Íslandi hefur þörfin fyrir aðgengilegar umbúðir með alþjóðlegu yfirbragði fyrir íslenskt lambakjöt í verslunum hérlendis orðið aðkallandi. Icelandic Lamb hefur nú í samvinnu við Krónuna, Kjarval og Norðlenska brugðist við og sett á markað nýja vörulínu með umbúðum á ensku. Þetta er í fyrsta sinn sem íslenskt lambakjöt er markaðssett til erlendra ferðamanna með þessum hætti hérlendis.

Á umbúðum vörulínunnar má finna uppskriftir að einföldum og fljótlegum réttum og miðast hrá­efnaúrvalið við algengt úrval í matvöruverslunum hér á landi segir Hafliði Halldórsson, verkefnastjóri hjá Icelandic Lamb. „Að mínu viti er lamb oftast hversdagsmatur og við viljum ekki flækja hlutina um of hér. Með þessari vörulínu viljum við stuðla að því að lamb verði oftar á borðum hversdags og einnig hvetja til aukinnar vöruþróunar í framsetningu lambakjöts.“

Nýja vörulínan kemur í fallegum umbúðum.

Fimm vörur

Í fyrstu er boðið upp á fimm vörur sem allar eru unnar úr stórum lærum segir Hafliði.

„Fyrst má nefna heilan innralærisvöðva sem er u.þ.b. 400 grömm. Vöðvinn er ætlaður til heilsteikingar í ofni eða á grilli og tekur allt að 30 mínútum í eldun. Þessi vara passar fyrir tvo fullorðna einstaklinga og hentar vel þegar fólk hefur rýmri tíma til undirbúnings. Hinar vörurnar eru allar u.þ.b. 200 g í pakka og þurfa eingöngu 5 mínútur eða skemmri eldunartíma: Lambasteikur, sem eru þunnar sneiðar sem henta t.d. í snöggsteikingu með steikarmeðlæti og sósum, mjaðma­steikur sem henta vel á grillið og í pönnusteikingu, lambamedalíur sem passa sem minni steikur og loks strimlar eða „stir fry“ sem eru sérlega góðir í alla fljóteldaða pönnurétti, til dæmis austurlenska wok-rétti sem taka 2-3 mínútur í eldun.“



Líka fyrir heimamenn

Þótt vörurnar séu tilkomnar vegna fjölgunar ferðamanna eru þær ekki síður stílaðar inn á Íslendinga, segir Hafliði. „Við stílum vörulínuna inn á báða hópana og vonum að Íslendingar taki líka vel í hana. Hún er hins vegar merkt á ensku í takt við eftirspurn eftir vel merktum matvörum á ensku í verslunum og algjörlega í samræmi við markmið verkefnisins sem er að auka sölu á lambakjöti til erlendra ferðamanna.“

Hann bendir á að Vesturlandabúar, þ.m.t. Íslendingar, versli inn nánast daglega og í körfuna rati í vaxandi mæli vörur sem eru ófrosnar, fljóteldaðar og einfaldar í notkun með leiðbeiningum eða uppskriftum.

„Þá er fjöldi heimila með einum eða tveimur einstaklingum sívaxandi og þessi hópur vill geta keypt smærri einingar og í leiðinni forðast matarsóun með kaupum á óþarflega stórum einingum.“

,,Okkar niðurstaða er sú að lambakjöt eigi mikið inni í vöruþróun, hafi setið eftir gagnvart öðrum kjöttegundum undanfarin ár," segir Hafliði.MYND/STEFÁN

Við þróun vörulínunnar voru markaðsaðstæður kannaðar og þróun í neysluhegðun skoðuð segir Hafliði.

„Við settum einnig saman hóp sérfræðinga um kjötskurð, matreiðslu og sölu til ráðgjafar um hvert skyldi stefnt. Okkar niðurstaða er sú að lambakjöt eigi mikið inni í vöruþróun, hafi setið eftir gagnvart öðrum kjöttegundum undanfarin ár og þetta verkefni var í kjölfarið þróað af okkur hjá Icelandic Lamb. Vöruþróunin hefur ef til vill ekki síst setið eftir varðandi hvernig fólk kaupir inn og hvernig fjölskyldur hafa minnkað. Nýja vörulínan er partur af endurkortlagningu dilksins til að auka vöruúrval og verðmæti íslensks lambakjöts.“

Verðlaunað markaðsefni

Ef þetta verkefni Icelandic Lamb lukkast vel gæti næsta skref verið að setja fullunna vöru sem þessa í útflutning.

„Hins vegar er útflutningur á frosnu lambakjöti þegar í gangi á ákveðna markaði á vegum sláturleyfishafa. Okkar áherslur snúa að því að hlúa sérstaklega að þeim mörkuðum sem eru vel borgandi en við erum til ráðgjafar við seljendur og kaupendur í því ferli og gefum leyfi til notkunar á vörumerki okkar og markaðsefni á ákveðnum mörkuðum að uppfylltum skilyrðum.Markaðsefni okkar hefur fengið verðlaun Félags íslenskra auglýsingateiknara 2016, tilnefningu til verðlauna „Arts Directors Club of Europe“ 2016 og tilnefningu til norrænna Emblu-matarverðlauna 2017.“

Lamb „stir fry“ með spínati, kirsuberjatómötum og mango chutney

Uppskriftin er fyrir 1 og eldunartími er einungis 3 mínútur.

1 pakki Lamb Stir-Fry

¼ rauðlaukur, sneiddur

5 kirsuberjatómatar, skornir í tvennt

2 msk. ólífuolía

1 msk. mango chutney

Spínat

Steikið kjötið á háum hita í 2 mín. Bætið mango chutney í og hrærið saman, bætið rauðlauk og tómötunum við og eldið í 1 mín. til viðbótar. Kryddið til og berið fram með góðu spínati.






Fleiri fréttir

Sjá meira


×