Bílar

Hyundai i30 N er 275 hestöfl

Finnur Thorlacius skrifar
Hyundai i30 N í Frankfurt.
Hyundai i30 N í Frankfurt.

Hyundai hefur nú bæst við „Hot hatch“-bransann með tilkomu i30 N bílsins sem nú er sýndur á bílasýningunni í Frankfurt. Hyundai i30 N kemur inn á markað þar sem fyrir eru bílar eins og Golf R og Golf GTI, Renault Megane RS, Ford Focus RS og Peugeot 308 GTi, svo einhverjir séu nefndir.

Hyundai i30 N virðist þó eiga fullt erindi í samkeppnina við þessa smáu kraftabíla, en i30 N er með 275 hestöfl undir húddinu, en einnig má fá hann í 250 hestafla útgáfu. Öflugri útgáfan er 6,2 sekúndur í hundraðið og sú aflminni 6,4. Hámarkshraði bílanna beggja er rafrænt takmarkaður við 250 km/klst.

Þó svo i30 N sé S-kóreskur var hann hannaður í Þýskalandi og prófanir og þróun hans fór einnig fram þar í landi. Þeir sem sáu um prófanir á Hyundai i30 N óku reynsluakstursbílum til dæmis alls 10.000 kílómetra á Nurburgring brautinni og því ætti Hyundai að vera komið með rétta stillingu á bílnum fyrir óvægan akstur. Til þess var jú leikurinn gerður, þ.e. að stilla fjöðrunina og stýringuna og aksturshjálparbúnað bílsins.

Sala á Hyundai i30 N hefst fyrir lok þessa árs, en 100 fyrstu First Edition eintökin af bílnum seldust upp á innan við tveimur sólarhringum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira