Bretar muni sjá eftir Brexit

Bretar munu sjá eftir því að yfirgefa Evrópusambandið. Þetta sagði Jean-Claude Juncker, forseti framkvæmdastjórnar Evrópusambandsins, á Evrópuþinginu í gær.

Sagði Juncker jafnframt að Brexit yrði sorgleg stund fyrir sambandið en að ESB myndi halda ótrautt áfram.

„Brexit er ekki framtíð Evrópu. Það mun ekki marka endalokin,“ sagði forseti framkvæmdastjórnarinnar.

Um var að ræða stefnuræðu framkvæmdastjórnarinnar þegar Evrópuþingið kom saman í Strassborg í gær.